周三假前港股回吐，一度跌315點，收市僅跌121點，今日期指結算，10月港股是龍是蟲，好快就知。不過，相比起大市方向，近日較多股民談論的，反而是熱門中資股狂炒同時，細價股卻完全屬兩回事，不但完全唔炒，更加係越跌越深，大市創新高同佢哋完全無關。
要解釋以上現象，其實理由十分簡單，現在是炒QDII及港股直通車的資金流入，這些資金如來自散戶，通常只炒有品牌的大股，而基金就更加只炒大唔炒細。第二係流通量問題，大價股流通量既高成交亦足夠，以上周五熱炒的中電信（728）為例，單日成交就已近9億股，涉資45億多元，炒呢類市值夠大嘅股票以量取勝，唔使升好多，都夠利潤有餘（仲未計成交都有34億銀嘅中電信窩輪）。細價股呢？就算炒到市值好高，都未必有呢個流通量，大基金唔易轉身。
量之外，係質。細價股早排備受盈警困擾，一出盈警或盈利大倒退，股價就可以即日勁跌20%，就算表面PE同P/B幾低，股價都可以屢創新低，同呢類股票計估值，完全冇着數。以日前公佈中期業績的銀建（171）為例，PE係得6倍，市值亦較賬面值有折讓，但中期盈利已大幅倒退51%，可見業績風險都係一大考慮因素。
航空收購戰耐人尋味
中國國航（753）本擬聯同國泰航空（293）收購東航（670）事件，發展至今仍有頗多耐人尋味之處，尤其係東航停牌幾個月咁耐，要入股阻撓新航，可以話大把時間，為何要等國資委批完至話加入收購？至於突然又話唔收購，更加令人覺得兒戲。但正是咁多古怪之處，至吸引到炒家低位買返轉頭，幾隻航空股再跌的話，不妨留意。