噚日講過港股市場炒大唔炒細嘅現象，主要原因都係因為QDII基金只買大價股，睇番近日國內放行QDII產品的進度加快，這個港股升市及集中在大價股身上的現象，令人更加恍然大悟。據國內報載，國內首隻全球性基金，南方全球精選基金在全國發售反應熱烈，首日已出現超購，昨輪到華夏基金全國發售。截至目前，QDII審批額度已經達到265.88億美元。
而在十一假後，嘉實與上投摩根公司的QDII產品將相繼公開發售。據將出任嘉實海外中國基金的基金經理表示，海外中國股票總市值達2.6萬億美元，接近國內A股市場的總市值，其中90%以上集中於港股，而海外中國股票主要由金融、能源、電信等藍籌股構成，這些股票在海外市場的市盈率幾乎僅為其在A股市場的一半，具有較高投資價值。
睇到呢度，應會明白大市值H股炒上完全係QDII資金流入所致，散戶嘅直通車資金，只係副車，幾時開通根本唔係焦點。
既然係基金經理揀股，除咗市值大之外，投資價值都好重要，𠵱家全球投資市場講緊美金大貶值，金礦股經過呢輪整固之後，相信好快又會重拾升勢，可以話有買貴無買錯，紫金（2899）噚日低位造咗支釘，整固應已差不多；嫌升得太勁，剛破頂嘅江銅（358）往績PE僅14倍，芬佬必然選擇之一。
中電新能源遲早炒
噚日內地資金掃貨掃到去電力股度，呢啲電力股唔少已嚴重落後其他H股，而且盈利派息穩定，所以資金遲早會掃到。雖然龍頭電力股一定炒先，但係已轉型做清潔能源嘅中電新能源（735）相信遲早會炒到，唔想高追大價嘢，此股不妨耐心累積。