過幾日，就係中華人民共和國58周年國慶，美資大行花旗，為咗慶祝中國生日，推出人民幣定存優惠，息率高達5.8厘。嗱，呢個世界邊有咁大隻蛤乸隨街跳㗎。家吓一般人仔定存都係得嗰0.45至0.86厘息，佢高咁多，梗有啲景轟。
首先，一定要係新存入嘅資金，銀碼至少要有5萬人仔；跟住仲要一次過開兩個人民幣定存戶口，一個係一星期嘅定存，另一個就長啲，要兩個月。睇到呢一度，華華都覺得無乜問題，係煩少少囉，之不過，下文先至係精髓。
夠過海食兩個包
5.8厘年利率，只適用於一星期定存嗰部份，而呢部份嘅存款上限係……1萬蚊。計落到期可以收番11.2人民幣利息，勉強夠坐程車過海，天水圍出中環就唔得嘞！
入場費5萬銀，減咗1萬蚊之後，剩番嗰4萬銀，就會放落兩個月定存戶口，年利率0.68厘，同市場差唔多；到期利息有45蚊人仔，食兩個麥記套餐都掹掹緊。