股市創新高，大家就識得去問香港股神李四叔，而四叔亦毫不吝嗇，再晒一晒佢將「實聽升的名單」，兼預告恒指見兩萬八。
至於金價仲會唔會升，梗係搵小金王、利昌金舖常務董事胡經昌問吓。不過，佢雖然同李股神一樣咁親民，但對於預測嘅嘢就冇去得咁盡，佢話：「金價年尾前仲有得升，但幅度唔會好大，家吓升到我都驚，唔敢估年尾去到咩位囉！」
個價郁先有肉食
不過，驚還驚，佢話金價升跌都唔係問題，最緊要個價郁，上落越多越好，咁先至多人有興趣買同賣，咁佢做agent嘅，先有生意做、有肉食。
唔好話香港傳媒現實，唔做預測，小金王冇乜記者圍應該預咗。雖然預測呢瓣胡經昌冇學四叔，但做公益同慈善，尤其係教育事業，佢就同四叔一樣咁支持。佢除咗成日搵人捐錢起學校，本身又係培華教育基金會嘅常務委員，至於培華咪就係四叔出錢搞㗎囉！
胡經昌同華華講，好多時利用周末假期，一支公自費飛上廣西，跟進吓當地學校嘅進展。好似上個月，佢由香港飛去南寧，再坐車去山區視察，來回要成9粒鐘，由於天時暑熱，山區設施有限，凉都未必有得冲，所以寧願辛苦啲即日來回。今勻去南寧，比往常頻撲，因為要抽時間幫培華基金贊助嘅溫暖行動，同廣西當地受助人洽商細節。
[email protected]