他們兩邊走，又是香港人，又是澳門人。從前，只有澳門人嚮往在香港打工，很少聽說香港人投奔澳門，賭城只是香港人的度假勝地銷金窩；時空挪移，香港不再是天之驕子，澳門不再是吳下阿蒙，不再是活在香港背影下的小腳色。所以音樂人李峻一來打香港人的工，被朋友質疑為何不好好留在澳門；所以秘書小姐Emily從香港到澳門，掙澳門的錢。 記者：蔡元貴
-教師：香港已無優勢-
李峻一於加拿大修讀音樂系，97、98年學成回到出生地澳門。那是臨近回歸黑幫廝殺腥風血雨的「九反歲月」，經濟不景，找工作很難。大學畢業生李峻一的首份職業，是在酒店coldcall客人，硬銷酒店套餐。半年後，在酒廊彈琴娛賓，再過三個月，才找得一份比較理想的職業，任職音樂教師。
直至2000年，在朋友介紹下，他把自己作曲填詞的作品交給也是澳門出生的作曲家陳輝陽，獲得賞識，打入香港樂壇，為唱片公司作曲填詞。起初很教人羨慕，幾年之後，世界變了：「初頭我可以搵到份香港嘅工，啲澳門朋友好羨慕我；𠵱家啲人知道我幫香港公司打工，就話留喺澳門做嘢咪仲好！」
羨慕港有言論自由
「悲觀啲講句，香港可能已經過咗最黃金嘅時間，鄰近地區起飛，香港相對優勢已經少咗。」風水輪流轉，不過澳門好，香港好，李峻一叫香港人不用灰心：「其實咁樣對香港仲有利，香港搵唔到嘢做，可以過澳門。」他在澳門的物業，也租了給一位香港工程師。
隨着兩地經濟發展，港人澳人的精神面貌，出現了微妙變化：「以前有啲香港人去到澳門好大口氣，彈三彈四，𠵱家佢哋謙厚咗，可能香港呢幾年經歷咗好多嘢；相反，以前澳門好純樸，唔追求名牌，𠵱家行街，見多咗LV、多咗人揸Benz。」
香港人眼紅澳門旅遊蓬勃，搶去黃金周的內地旅客。李峻一可沒有被黃金冲昏頭腦：「好多嘢，唔係靠自己努力得番來，唔值得咁高興。澳門開放賭權係靠中央特權批准，正如香港股市咁旺都係靠中央嘅QDII，好被動。但係冇辦法，澳門其他方面冇乜競爭力。」
外人眼見的浮華，並非所有澳門人都有福消受：「好簡單一樣嘢，𠵱家啲有經驗嘅大廚都去晒賭場酒店，餐廳食物質素下降。我覺得，只有生活喺同賭場掛鈎嘅圈子裏面嘅人，先得到賭權開放嘅好處。」
香港還是有叫澳門人妒忌之處的，有種東西，叫做言論自由：「我哋個社會埋藏咗好多問題，立法會由商人主導，冇真正為澳門普羅大眾謀福利。」
「澳門人有時覺得香港人太過份，好似幾年前鬧董建華，香港所有問題都歸咎佢一個人身上。不過我都希望澳門可以多啲言論自由。所以今年5.1遊行，係好事；唔理訴求對與錯，起碼可以有自由表達。」
香港現況
面積：1,092平方公里
人口：698萬
06-07年度博彩收入：494.2億元
今年5-7月失業率：4.10%
本地人均生產總值：198,042元
今年1-6月旅客人次：1,303萬
今年7月通脹率：1.50%
全國城市競爭力排名：第1
-OL：澳門不再悠閒-
在內地出世的Emily，父親是香港人，但媽媽早年帶了她移民澳門。Emily在澳門讀幼稚園和小學，那時候幾個月才去香港見爸爸一次。中學時期，Emily成功申請來港讀書，成為香港人。97年畢業，Emily在測量師行找到秘書工作。
自從澳門開放賭權，經濟起飛，加上香港經歷沙士之後元氣大傷，港澳兩地此起彼落，就連Emily的母親也勸她返澳門：「媽咪話澳門好好景，身邊啲朋友都叫我去澳門做dealer（荷官）。」
三個月前，Emily過了澳門做秘書，她說碰巧那間公司在澳門設有寫字樓，她選擇的是工作性質，並非澳門。
Emily說自己從來沒有刻意重返澳門討活，即使在2003年香港回歸以來最壞的時候，都沒打算走。
「香港有乜唔好？點解一時經濟差咗就要走？咁如果澳門經濟泡沫爆破，我又可以去邊？」
但Emily還是回到澳門了，只是回家的感覺有點異樣罷了。
「𠵱家呢度已經唔係我小時候嘅澳門，冇咗以前嗰種悠閒嘅感覺，我覺得係俾遊客逼到佢哋變成咁樣。」
Emily說，童年在澳門讀書，午飯時間有兩小時：「𠵱家澳門生活節奏快咗好多，得一個鐘食飯，唔知係一種進步，定係俾人逼成咁。」
Emily以豬扒包作例子：「好似食豬扒包咁，都商業化晒，再唔係細個時嗰種。以前嘅豬扒包係唔會趕時間做出來嘅，塊豬扒係生勾勾好有心機咁煮熟，等成十分鐘先有得食；𠵱家好多都係一分鐘就有即刻有得食……好失落。」
「鄰里關係生疏咗」
澳門本來是個人情味很濃的地方，一座樓五、六層，家家戶戶都熟絡親切：「有時落到樓下買嘢，唔記得帶錢都冇問題，啲媽咪有急事叫樓下間舖個老細幫手睇住又得。𠵱家？鄰里關係生疏咗，冇晒呢種融洽感覺。」
Emily說不出這些轉變是好是壞，她認為，一個地方不能永遠原地踏步，正如香港不可以永遠都是漁村。
香港與澳門各自回歸這麼多年，總是有人愛把兩地比較。Emily覺得，誰高誰低都沒有所謂：「香港同澳門係同一個阿媽生，出世之後畀咗唔同人湊，點解唔可以各有成就？」
澳門現況
面積：28.2平方公里
人口：45.7萬
06-07年度博彩收入：約651.7億元
今年5-7月失業率：3.10%
本地人均生產總值：200,382元
今年1-6月旅客人次：1,260萬
今年7月通脹率：5.96%
全國城市競爭力排名：第10
資料來源：蘋果資料室
