近年越嚟越多中國導演、明星攞到奧斯卡；唔講唔知，喺金融界都有唔少公司攞奧斯卡，華華講嘅係被譽為「年報奧斯卡」嘅紐約國際年報比賽（ARC）。一本好嘅公司年報，最緊要咪隱惡揚善，當然最好就係有內涵之餘，仲有外貌。
同拍電影斯卡一樣，根據唔同嘅內容，年報都有唔同嘅獎項。如果話，導演係電影嘅靈魂，咁主席或總裁，就應該係機構嘅靈魂。喺非盈利機構組別度，憑「總裁的信」攞獎嘅香港機構，居然佔咗兩位，包括銀獎嘅金管局同銅獎嘅城大。任總一開口，就揮低全球對手，果真非同凡響。
至於中銀香港（2388），亦憑「主席的話」推進戰略為達更廣闊前景（MovingForwardwithaStrategyforBroader），喺銀行組別攞到個榮譽獎，董事長肖鋼拍得住任總。
華華見到喺整體年報分類入面，銀行、投資能源、地產、電訊同埋交通呢幾個項目，有份攞獎嘅，大部份都係香港嘅上市公司，好似中電（002）、地鐵（066）、恒地（012）、希慎（014）、中銀香港、恒生銀行（011）等，其實佢哋好多都係呢個獎嘅常客，見慣不怪！