外表開朗又夠儍氣的胡琳，擁有不俗的身形，原來卻十分保守。雖然她很喜歡曬太陽，也愛水上活動，但她游水時不愛穿比堅尼，寧願穿一件頭泳衣，以遮掩臀部和腰間的贅肉。
陽光與海灘最襯年輕的比堅尼女郎，27歲的胡琳當然也愛曬太陽，但她自言周身多贅肉，所以不會穿得太性感，她說：「我好鍾意曬太陽㗎，都好鍾意游水，但係我唔着比堅尼，最好着一件頭嗰啲啦！我patpat同腰都有肥肉，而且游得深啲就驚，所以我都係適合去泳池，同啲婆婆、小朋友一齊游。」
常喃喃自語
拍照當天，胡琳在烈日當空下，不斷喃喃自語提醒自己裝出笑容，她解釋：「唔知點解我平時影相都好cool，啲人睇相以為我好惡，其實我都唔係咁嘅，加上唔慣笑嘅時候露牙肉，所以不斷提住自己。」不過記者覺得胡琳經常放笑彈，令一眾工作人員十分開懷。
藝人經常成為焦點，愛玩水上活動的胡琳，卻不怕被途人認出引來不便，她說：「我間中都會同圈中人去玩㗎，好似之前有個遊樂場，我都約埋一班歌手一齊去玩，玩得好開心㖭！」
盼出海癲吓
胡琳續說：「做藝人都有自己嘅朋友，而且都要去玩嘅，我最想搵一日約埋班朋友出海癲吓，但係個個都咁忙，好難約得齊。」
採訪：王連連 攝影：陳俊強
化妝：SynniTam 髮型：EdmondLeung
