下個禮拜一，除咗係十一國慶，對於吳光正嚟講，可以話係別具意義，因為佢揸咗7年嘅貿易發展局主席「權杖」，喺呢一日要交畀着數哥蘇澤光。噚日應該係吳光正最後一次以貿發局主席身份出席公開場合，為灣仔會議展覽中心主持中庭擴建儀式。
唔夠大 點同人揮
對於有啲人嚟講，7年應該會覺得「身痕」，對於吳光正嚟講，呢7年就留低一個遺憾。佢同華華講：「最遺憾係仲未可以幫會展爭取到第三期擴建。」呢項咁艱巨嘅任務，要留番畀着數哥嚟幫佢圓夢。估唔到着數哥未戴「后冠」未接權杖，就已經接到上任留落嚟嘅大order。
點解會展三期會令吳光正抱憾？佢解釋：「周圍城市喺過去3年，大力發展會議展覽業，額外新增咗90萬平方米展覽設施。潮流最新競爭標準趨勢係，展覽面積最少達10萬平方米規模，先至能夠同人鬥。」
不過即使𠵱家進行緊中庭擴建工程，到09年首季落成時，灣仔會展總面積增加四成，都係得嗰6.6萬平方米，有排未夠班同人鍊。佢話好希望呢一屆立法會會期裏面，能夠取得社會共識，認同灣仔會展進一步擴展嘅重要性，然後盡快落實；否則香港雖然有展覽服務軟件優勢，唔會咁快全軍覆沒，但形勢相當嚴峻。
雖然吳光正臨別贈言，有啲似每年港姐決賽，即將卸任嘅港姐繞場一周同大家saygoodbye，但華華仍然感受到佢句句都出自肺腑。
[email protected]
會展威水史
獲獎無數：97及04年「CIM榮譽大獎」、98年旅遊業大獎之「最佳會議及展覽中心」、「98年度業界服務金獎」、98年「最佳會議/展覽中心」，及連續3年被全球數十萬間旅行社推選為「亞洲最佳會議中心」
05至06年度：共舉辦1322項活動，包括103個主要展覽
06年11月：新地（016）副主席郭炳江千金郭曉妍，同著名建築師呂元祥兒子呂慶耀，揀中會展舉行婚宴
05年12月：舉辦6日世界貿易組織（WTO）部長級會議，韓國農民示威，攻陷會展外圍一帶地段
97年7月：舉行回歸典禮，當時國家主席江澤民及英國查理斯王子同站舞台，寫下歷史性一刻
97年6月：完成擴建新翼工程，耗資48億元。設計如海鷗展翼，寓意帶動香港經濟起飛，但更多人說似海龜
88年11月：開幕，建築成本16億元