只升不跌害穩定 - 左丁山

只升不跌害穩定 - 左丁山

聯儲局喺九月十八日一聲減息半厘,全球股票急速上升,黃金、石油與外滙(兌美元)一同升上高位,加拿大元兌美元升破一算,幾年前到加拿大買屋嘅朋友,賺到笑。
冇得笑嘅,當然係冇錢投資,生活僅堪溫飽或朝不保夕之人,只係得個睇字,容易患上眼紅症。左丁山從來都唔認為貧富可以均勻,小部份人擁有大部份社會財富,係資本主義社會之基本道理,無人可以改變,除非廢除資本主義,厲行共產主義,大家一齊窮,就無貧富之分嘞,即使在實行極高稅率之社會民主國家如北歐地區,大財團、大家族仍然擁有更多錢。
但係如果經濟增長只係為咗股市大升,益晒啲有錢投資者,公共政策完全向投資者傾斜,左丁山就覺得唔多妥。九月二十二日朝早睇CNBC重播美國股市收市報道ClosingBell節目,三位主持人包括靚女瑪莉亞訪問兩位基金經理,問佢哋後市點睇。基金經理話減息之後,牛市更加美妙。瑪莉亞問,乜高油價、高金價、高商品價唔會推高通脹咩?基金經理話,聯儲局減息,即係唔怕通脹,況且商品價格上升,仲未影響到消費者,而工人生產力上升,低工資(lowwages)可以抵銷商品價格上揚。
令人反感兼嘆息嘅係,低工資究竟幾時先至可以上升?經濟好,話要限制工資,防止通脹;經濟唔好,工資更加難升。難道升來升去,都係股市先至准升,工資永遠唔好升?聯儲局睇見工資上升時會加息,美其名曰壓抑通脹,但股市一跌,就立即減息,美其名曰救市。唔怪得《華爾街日報》做一個民意調查,有39%美國人唔希望減息,因為減息只係對炒家、投資者(或泛稱有錢人)最有利,窮人都冇錢買股票,港交所(388)股價狂升,關佢哋鬼事咩。股市長期穩步上揚,與經濟增長同步,服從經濟循環,先至係好事。好似𠵱家咁,全世界政府(包括中國)只想股市升,唔准股市跌,只會為社會階級鬥爭埋下火藥線。