噚日係中秋佳節，大節流流，晏晝時分，正當八方諗緊去邊度賞月之際，忽然接到個電話，原來係梁振英先生打嚟。佢當然唔係打嚟祝八方中秋節快樂啦，原來係為咗早前有朋友向八方報料，話喺東京成田機場見到振英哥同兩位女士去日本過關嗰單嘢，打嚟找八方晦氣。
冇可能打到眼色
八方嘅朋友當時話，見到振英哥去東京，同行有兩位女士，其中一位女士過關時唔聽移民局官員指示，擅自行咗優先通道。八方當日搵過振英哥嘅助手求證，但對方話唔回應。振英哥返香港之後，噚日特別向八方鄭重澄清，當時佢係同老婆同個仔，一行三人去旅行，當中只有佢太太一位女士，絕對冇八方朋友口中嘅妙齡女子。
至於當日嗰位被指擅用優先通道嘅中年女子，振英哥話根本唔識得佢，雙方全程冇任何接觸。佢仲話，嗰位中年女子當時背住自己，根本冇可能好似八方朋友咁講，有同呢位女子打眼色。梁生話，好彩當日佢老婆同行，如果唔係無端端俾人話佢同個妙齡女子去日本，可以係好嚴重嘅事。