陳太同葉太未有耐埋身肉搏，全城已經未選先興奮。成日為政界人士求籤嘅北角關帝廟噚日趁中秋佳節，預測吓選情，最後幫陳太求到上上籤，葉太就中吉籤。負責求籤嘅香港關帝堂慈善協會會長余立敏睇完籤文之後，就買陳太win，葉太有冇機就要睇天意，其中一個指標，竟然係未來三日個天有冇雨落。
陳太上上籤：郊祁同科
「郊祁同科」係指宋朝有對兄弟叫宋郊同宋祁，一齊考科舉，結果雙雙高中。余立敏話呢支籤係超級好籤，代表陳太好事近，贏面好大，佔盡天時地利人和，「丹詔槐黃消息近」即係叫陳太等聽好消息咁話。不過佢一定要同泛民班兄弟姊妹拍住上先會雙贏，唔係就雙輸，「陳太一個人唔夠力，要兄弟同心先得，互相帶挈。」籤文又叫陳太「一意謙撝莫自矜」，即係凡事謙遜，唔好炫耀自滿，仲要放下身段。
陳太呢支上上籤嘅內容熟口熟面，原來余立敏04年都幫蔡素玉求到同一支，結果佢同馬力雙雙當選立法會。之前先公開質疑過陳太「忽然民主」嘅蔡菜子噚日同八方大讚支籤好鬼準，朋友響佢當選前一晚特登幫佢求，不過佢就唔肯估今次會唔會一樣咁靈。
葉太中吉籤：邵堯夫告天
相傳做官嘅邵堯夫見到有條村旱災，啲田好耐冇收成，村民餓到就嚟死。邵堯夫就跪天求神，結果終於有雨落，救番成條村。一句講晒：即係睇天意。余立敏就奉勸葉太要改吓啲火爆性格，個天先會騷佢，「邵堯夫求個天落雨，梗係要低聲下氣啦，葉太講嘢都唔好咁硬淨，做人都係soft啲好。」
籤文最後話：「與子定期三日內，田疇霑足雨滂沱。」余立敏解釋，個天肯落滂沱大雨，即係肯助葉太一把，就化凶為吉喇，「如果呢三日落大雨，葉太就有得fight過，如果冇，（選情）就掹啲喇！」根據天文台嘅科學預測，未來三日都係多雲有幾陣雨，不過間中天文台嘅準確性低過求籤，八方惟有套用葉劉力推23條時嘅名句：放長雙眼睇（會唔會落雨）啦，各位！
