泛民下月7號會搞個萬人撐普選活動，希望搵夠一萬個市民喺維園撐住遮砌2012字樣。泛民最初以為訂咗四個維園足球場，可以喺中央齊整咁拼出2012四個字；點知佢哋book場時有誤會，只係book到左邊數起四個，即係三個喺左邊一個喺右邊，砌字時就會唔平衡，唔多好睇。
泛民隨即補鑊，向康文署申請多個喺右邊嘅球場，點知康文署拒絕，理由係要空出個場做緩衝，費事嘈親喺天后嗰邊踢波嘅市民喎。泛民聽到康文署寧願吉咗個場都唔肯租畀佢哋真係嬲到爆，覺得康文署刻意阻撓。不過佢哋話最多咪將2012年字樣砌喺一邊，企密啲，縮細啲個字，但一萬人嘅目標人數冇變。