26/09/07
天陰有雨
最新動態
有同事話睇咗成個禮拜波，賭咗成個禮拜波，昅實個股市成個禮拜，終於今日中秋可以唞一唞；喺我眼中，唞一唞嘅意思可能係放番三五日假，完全抽離，或者呢排手氣差、個股市牛皮或者低迷，暫時唔掂。
呢個彈丸之地充滿機會，問題係個人性格，或者決心有幾大，我自己態度係後生辛苦啲，好過臨老先嚟博，相信友人嘅另一半應該識體諒；適逢個市旺，自不能放過良機，又唔係股神畢菲特，自問冇咁嘅耐性同財力，個幾揸中石油（857）到𠵱家，短線睇，呢排應該多做功課搵吓錢。至於老本行，𠵱家收費電視台瘋狂播波，為啖氣，兩台連好多水準唔高嘅意甲波都播埋，今晚播足6場，包括卡坦尼亞「大戰」安玻里，收視率應該炒埋唔夠一場英冠侯城對車仔嘅聯賽盃啩。
唞吓？個人買波睇軍情加數據，仲有臨場睇陣，今晚捱吓眼瞓睇埋個陣，有好嘢都未定；英超隊係唔係強陣踢聯賽盃真係臨場先知，我信多勞多得。
蘋果波神
沒有成功，沒有失敗，最重要你是否仍然享受箇中樂趣，否則不如不玩好了。
http://hk.myblog.yahoo.com/footballexperts/
逢周一至五見報