Car通：良心限量版<br>Aprilia07　成人玩具

Car通：良心限量版
Aprilia07　成人玩具

會轉彎又會轟轟聲震震震，騎上去包你有一種……一種興奮到打冷震嘅感覺！呢件係一件成人玩具，唔該唔好用嚟代步，亦都唔好揸佢去開工，正如你落蘭桂坊蒲都唔會自備女伴咁嘥料。
男人嘅浪漫就係咁，愛iPhone因為未有行貨，買別注玩具因為夠限量，呢架Tuono1000RFactory賣16萬幾唔算好貴，但係全球限量300架，人有我冇兼有錢都未必買到，你睇佢幾咁火辣辣？真係興奮到硬住頭皮畀錢佢使。

文：嘴嚼爺　攝影：伍慶泉
Model：Fion

抵玩過普通版

全球限量300架，香港上星期啱啱返咗一架，新車落地準備交畀客，矜貴到不設試車。亞林負責人話呢部車訂一部嚟一部，𠵱家想訂都可以打去試吓，車廠暫時可能仲有少量存貨。
講番實際，呢架2007ApriliaTuono1000RFactory限量版其實好厚道好有良心，並非齋換車花加個簽名編號嘅呃錢之作。和普通版車價相差$28,200蚊，但換上金屬藍色合金花軨、Ohlins前倒立前叉後單筒避震、Brembo鮑魚已經值回票價，加上全金色車架同碳纖肚兜、啡呤、泥擋，車行分分鐘仲賺得少過普通版。如果想出Tuono1000，筆者真係諗唔到唔買限量版嘅理由。

■限量版落足料，淨係頭轆已經值回票價，新車落地已冇乜嘢好改。

■個人覺得最搶眼最型係全副金色車架，加埋新鎂合金引擎令架車惡得嚟多番啲品味。

惹人犯罪誘人超速

名花有主唔掂得，但齋睇規格同以Tuono1000嘅經驗嚟講，139匹馬力及10.9kgm最大扭力已經好無敵，除非咁啱喺石澳彎路遇到拉利林寶，否則好難輸。留意，筆者唔係鼓吹大家飆車，只不過係騎咗上去，轉綠燈啪個二波扭油已經好難等埋隔籬架車，有心抦多兩抦，由荃灣出中環分分鐘突破十分鐘關口，惟有講句——小心超速。