陳豪昨日以模特兒身份為服裝品牌行騷，獲低胸外籍女模特兒請食波餅，陳豪事後即高呼自己清白，自言目不斜視。對於被無綫力谷做視帝，陳豪自信地表示從來未有質疑自己演戲的能力。
陳豪昨日於尖沙嘴為服飾品牌「Vintage55」擔任模特兒，模特兒出身的陳豪行騷時表現專業，當大會安排他與性感低胸外籍女模特兒合照時，女模特兒主動拖手及搭着陳豪肩膊，陳豪也豎起大拇指，兩人合照時，女模更請陳豪食波餅。
「頭先目不斜視」
問到陳豪食波餅滋味如何時，他說：「食月餅呀！我頭先目不斜視，完全冇掂到，總之我清白㗎！」他表示事前未有綵排，也不知有性感女模特兒，他說：「事前都冇綵排，我個人比較保守，怕醜係我優點，不過頭先OK啦，都冇乜嘢呀。」對於近日頻頻接工作，他表示乃生意之一，問到是否想追上其緋聞女友廖碧兒，成為無綫最賺錢藝員的第一位，他說：「佢本身好叻女！」對於會否介意身邊人賺錢比自己多時，陳豪說：「梗係唔介意啦！不過你哋唔好跣我。」
陳豪對於被無綫力谷做視帝，即將播出的新劇《通天幹探》更是台慶劇，他說：「唔係！咁啱套劇安排出街，咁我自己都好有信心，所有嘢都係公司安排。」
問陳豪是否對視帝一獎信心十足？他說：「平常心啦，我最希望係大家欣賞個角色，不過我從來都唔質疑自己演戲嘅能力，但係攞獎係天時地利人和嘅配合，有信心但唔一定可以攞到。」
嘉穎睇好做視帝
此外，鄭嘉穎昨日接受商台電話訪問，對於被指因不滿與徐子珊一起拍無綫月曆，所以與陳豪對調，鄭嘉穎說：「其實係因為陳豪喺西藏拍緊劇，趕唔切去台灣影相，所以我代替佢個位，陳豪就代替番我。」對於今年可會冧莊視帝，鄭嘉穎說：「今年好明顯《溏心風暴》個勢好勁，我睇好陳豪同李司棋。」
採訪：王崇穎
攝影：仇志德
