一班高妹如陳敏之、廖碧兒和LisaS.等，昨日在銅鑼灣行鞋騷時，各自展示長腿魅力，但原來美麗背後有苦惱，陳敏之謂常因腿長失平衡而拗柴，廖碧兒與男伴拍劇、出街，鞋跟高矮都要計過度過。
廖碧兒、陳敏之、名模LisaS.、MandyLieu和「翻版關之琳」Joycelyn等，昨日在銅鑼灣為鞋履品牌Aerosoles行騷，一眾高妹穿上短裙、超短熱褲等，大騷長腿，不過美麗長腿背後，卻同樣有苦處。
做足脫毛磨砂
穿黑色迷你裙行騷的陳敏之，在台上賣力攬佈景板，十分誘惑，但不慎露出打底褲。她說：「唔知，我上下都打足底，着咗黑色打底褲，望落唔覺走光。」記者謂她甫士誘人，她說：「係大會要求，今次sell鞋，下半身緊要啲，我事前做足脫毛、磨砂工夫，仲搽咗大量lotion。」
陳敏之謂不時有男士讚揚其一對長腿，她說：「有苦自己知，人高、對腳太長，唔平衡好易仆親，我成日都會拗柴，仲會腰骨痛㖭。」
「要計過度過」
廖碧兒自爆平素愛穿波鞋，但穿高跟鞋與男士拍劇、去街，則要計過度過，她說：「要睇吓對方高唔高，馬仔（馬浚偉）就着兩吋半踭，撈家（羅嘉良）、黃浩然就可以着到三、四吋踭。」至於緋聞男友陳豪？她即說：「唔知喎，之前合作嘅劇一係打戲，一係做醫生，都冇留意。」
此外，Mandy開心指男友陳柏霖剛在港，可一起首次過中秋，她說：「佢（指陳柏霖）喺香港，幾日後就去上海工作，我哋可能去BBQ，不過今年天氣唔好，或者睇唔到月光，咁就一齊返屋企睇電視囉！」她又覺得女性以穿兩吋踭的高跟鞋最能凸顯雙腿線條美。
採訪：MaggieLaw
攝影：MatthewLam
