MaggieQ早幾日至喺北京同上海宣揚完愛護動物嘅訊息，噚日喺中環一間酒店繼續為善待動物組織請命，呼籲啲人唔好食肉，轉做素食者。不過榮升做咗荷李活明星之後，MaggieQ嘅排場都唔同晒，除咗有個外籍經理人跟出跟入之外，記者會無故推遲咗成35分鐘至開始，會上仲只有官方提問，記者只可以聽，連最基本嘅問答時間都慳番。
自認保守
不過MaggieQ對啲動物就真係好有心，佢話自己食素已經有七、八年，講到拍攝嗰兩款海報，佢用英文話：「我希望可以代替這些動物去傾訴牠們的感受，至於宣傳海報拍得如此激進，是想用這種手法引起世人的關注，傳達善待動物的訊息。」佢笑言起先聽到個概念都嚇一驚，因為自己係比較保守嘅人，佢話：「拍紅辣椒那款時覺得好熱，生菜那款就好擔心。」
MaggieQ話呢幾年身邊嘅朋友同親人受佢影響大部份都轉咗食齋，但就冇同佢合作過嘅外國演員好似布斯韋理士（BruceWillis）同湯告魯斯（TomCruise）講過，佢話大家工作時都好專心唔會講其他嘢。