車震男主角梁榮忠、被傳介入陶大宇婚姻的郭羨妮以及無綫總經理陳志雲愛將崔建邦，近年因為是非新聞不絕形象欠佳，三人獲無綫安排在月底攀爬海拔6,000多米的玉珠峰洗底兼過冷河，昨日齊齊拜神準備冒險，期望藉今次終極一雪來擺脫負面形象。
無綫40周年台慶特備節目《勇闖玉珠峰》安排崔建邦、梁榮忠和郭羨妮勇闖海拔6,178米的玉珠峰，無綫總經理陳志雲曾表示希望藉今次攀山讓三人盡訴心中情，令觀眾對他們改觀。大隊明天出發，昨日眾人於將軍澳電視廣播城舉行拜神儀式，安排崔建邦、梁榮忠和郭羨妮進行破冰儀式，寓意三人成功登山後，可以衝出雪櫃，重新做人。
郭羨妮多次捲入三角戀，最近一次還令陶大宇婚姻破裂，形象直插谷底，對於有機洗底，她說：「我冇諗咁多，我覺得呢個機會好難得，因為自己係唔會去，公司叫我就一口應承，亦唔會擔心咁多，唔諗咁多會好啲！」
忠仔興奮
「自己開心就得喇」
與朱慧敏車震後難以翻身的梁榮忠則否認藉此洗底，他說：「我唔會理會其他人講乜嘢，𠵱家做好呢個工作，自己開心就得喇，其他我都控制唔到，今次上山我會盡力而為，最希望可以齊齊整整返來。」被指樹大招風的崔建邦，談及今次洗底之旅則說：「我唔覺得，藝人要多方面嘗試，唔好被定型，有得去我好開心，相信去完返嚟仲可以大展拳腳。」鄧健泓早前稱陳志雲是蜜糖，崔建邦對此說：「佢（陳志雲）係我伯樂，今次有機會去好多謝佢，相信今次係一個機會畀觀眾睇到我另外一面。」
《勇闖玉珠峰》安排在11月4日播出，共15人的攀山攝製隊於明天出發，預計需時兩星期征服玉珠峰，也是電視史上一次征服最高海拔的攀山之旅。據隨隊出發的編審李天佑說：「去到海拔5,000米時，即係差唔多我哋喺玉珠峰嘅起點，正常人已經有高山反應。我哋要再行多1,178米到達玉珠峰，所以可能有人係要中途放棄。兩星期入面，上山時間只係四日，預計有三次登峰機會，不過都要睇天氣變化。」三位藝員都沒有接受持別訓練，監製張嘉玲說：「其實最大敵人係傷風感冒，我哋個個都有買保險，之前做bodycheck同打針，心理質素好緊要，唔關體能事。」
志雲幫拖
崔建邦有重要任務
此外，陳志雲昨日在中環為《志雲飯局》訪問港交所主席夏佳理，問到崔建邦是否仍得寵時，他說：「公司只係為佢設計一個新突破，佢返嚟之後應該會繼續主持《勁歌》，鄧健泓之後都要拍劇，最多只係做一季，所以唔係取代、只係暫代，公司安排咗崔建邦10月主持《再會歡樂今宵》，一共20集，咁重要任務，點算將佢踢埋一邊？」
問陳志雲是否為郭羨妮和梁榮忠洗底時，他說：「唔係洗底，係真人騷，郭羡妮同崔建邦都未做過呢啲節目，而梁榮忠就去過南極，希望佢哋會擦出新火花，講到啲心底話。」
採訪、攝影：楊潔雯、卓寶花、仇志中
話你知：玉珠峰低溫-30℃
郭羨妮、梁榮忠和崔建邦準備攀登的玉珠峰，又稱可可賽極門峰，位於青海省中部，是崑崙山東段最高峰，海拔6,178米。玉珠峰地區屬大陸性氣候，全年僅200毫米降雨量，每年平均氣溫攝氏零下5度，最低氣溫可達攝氏零下30度。玉珠峰攀登難度不算很高，一直被登山愛好者視為訓練基地，然而於00年，有5名攀山員在此遇難。
專家話：3,000米現高山反應
攀山專家鍾健民表示，攀爬6,000米高的山峰並非人類極限，最重要是放慢進度，讓身體適應高山的情況，他說：「通常上3,000米開始有高山反應，例如頭痛、發燒、肺水腫等。一路上就越嚴重，所以最好等身體慢慢適應，先再上去。」他提醒參與攀山活動的市民不要以為山不高不斜，就輕視危險性，因為有其他潛在危險，如天氣變壞及大風雪等。他建議出發前要在體能、裝備及知識上有充份準備，切忌因為有專家同行而鬆懈，他說：「佢哋只可以協助你，好似揹重嘢，但好多事上面其實都要靠自己。」
娛樂資料庫：因乜解究犯眾憎
無綫三位失意藝人梁榮忠、郭羨妮、崔建邦冒着攝氏零下30度的嚴寒天氣及高山症的威脅，登上玉珠峰，到底他們做了甚麼事要上雪山洗底？
藝人：梁榮忠
年齡：43
衰乜：因主持《殘酷一叮》人氣勁升的梁榮忠，前年被拍到背着女友鍾麗淇與港姐朱慧敏在車廂激吻，形象盡毀，更被封為「車震賤男」
藝人：郭羨妮
年齡：33
衰乜：形象一向麻麻的郭羨妮，今年又爆出與有婦之夫陶大宇因拍攝《學警出更》時撻着，更被封為「狐妮」
藝人：崔建邦
年齡：28
衰乜：出道不久便成為主持王，因而被指靠無綫高層陳志雲上位，成為市民圍剿對象，可說是樹大招風，上位過急累事
資料來源：《蘋果》資料室
