中秋逢打風落雨，認真殺風景。今年各大酒店的月餅非常講究包裝，又時興迷你月餅；帝京酒店嘅迷你月餅盒相信造價要幾十蚊，置地文華月餅盒黑色面，內有銀色小櫃桶裝住啲月餅，一定冧暈啲西方遊客。洲際酒店欣圖軒月餅盒比較傳統，紅色盒面上印咗杜牧嘅七言絕詩「秋夕」：「銀燭秋光冷畫屏，輕羅小扇撲流螢；天階夜色涼如水，坐看牽牛織女星。」詩中情境，在今天香港，已經好難見得到，如果住在飛鵝山上之獨立屋好似以前葉太咁，或者會有。不過以此詩配中秋月餅，未免淒清一點，欠缺人月兩團圓嘅歡樂氣氛！讀此詩，食月餅或會冇乜心機，牛郎織女每年七月初七相會一次，好唔妥啫。《唐詩三百首》所載之杜牧七言絕詩，每多幽怨之情，例如：「二十四橋明月夜，玉人何處教吹簫」；「十年一覺揚州夢，贏得青樓薄倖名」；「多情卻似總無情，唯覺尊前笑不成」；「蠟燭有心還惜別，替人垂淚到天明」；「日暮東風怨啼鳥，落花猶似墜樓人」。於中秋月夜讀之，恐怕會啋一聲。
古人寫月，每多思念之情，別離之怨，即使係秦觀詞（八六子），「夜月一簾幽夢，春風十里柔情」似是浪漫十足，跟住一句就係，「怎奈何歡娛漸隨流水，素弦聲斷，翠綃香減……」好殺風景啫。還是李後主「菩薩蠻」教人開心：「花明月黯飛輕霧，今宵好向郎邊去，衩襪步香階，手提金縷鞋。畫堂南畔見，一晌偎人顫；奴為出來難，教郎恣意憐。」今年中秋月黯，如有情人如此，還去賞月作甚？
睇月餅盒之杜牧詩，貪過癮去搵書，因平時讀書少，搵咗一輪，都未搵到充滿快樂氣氛嘅中秋月詩句，唯有放棄，應咗「書到用時方恨少」一句。與中文系校友Ｓ講起，佢即刻贈左丁山一句：「春有百花秋有月，夏有涼風冬有雪，若無閑事掛心頭，便是人間好時節。」左丁山聽到，大叫好詩，甚有哲理，人生唔好要求咁多，成日傷春悲秋，苦冬畏夏，容乜易減壽幾年吖！中文系校友Ｓ話呢首詩係一位宋朝禪僧「無門和尚」所寫，月餅盒上如要詩詞，可選這一首，杜牧詩唔多啱用，如用李白之古詩「把酒問月」就未免長一啲喎。