婚前爛蒲爛玩嘅日本女星廣末涼子，自從04年同模特兒兼設計師老公岡澤高宏奉子成婚後，修心養性咗唔少，最近廣末仲為網站化身「阿茂」教整餅，以賢妻良母形象上陣咁話。
邊整邊嗌香
近日工作量唔多嘅廣末涼子，最近獲一個日本網站邀請，每星期喺網站嘅「廣末Bakery」網誌度，教各位網友整麵包，仲分幾集播㖭，第一炮係跟老師學整拖肥咖啡麵包，頭三集就係教點樣整個麵糰。
正式開始前，廣末先提醒網友記得洗手，唔係食到囝囝肚痛就弊喇。之後佢就好留心聽老師講解，睇見佢搓麵粉嘅手勢似模似樣，攞住完成嘅麵粉糰嘅佢仲一臉滿足㖭，相信佢平日都會入吓廚房，整小食畀囝囝宏志品嚐。廣末一邊整，包都未整好一半就大叫好香，認真搞笑！
網址： http://tv.freak-web.jp/hirosue/
版主：網盜王尊尼Deep
本欄逢周一至五刊出