澳門賭業興旺，尤其威尼斯人度假村開幕後，好多人就算唔賭都當去旅行參觀一下，連81歲嘅白雪仙都唔執輸。上星期五（21日）傍晚6點幾，馮仁昭就喺威尼斯人撞到佢，仙姐挽住友人隻手，有十幾個戲迷陪住，浩浩蕩蕩咁喺大賭廳行過，其間佢行得好慢，不停東張西望，又不時抬頭睇嘢，睇嚟好欣賞賭場天花板嘅古典名畫。
「我嚟睇吓啫」
仙姐早排欣賞林家聲演出時，因為跌親手，要用絲巾紮住，但呢日見佢似乎康復得七七八八，唔使包紮，精神仲唔錯。不過佢左耳聽力一向唔係太好，所以馮仁昭埋去同佢傾偈時，佢都聽得好吃力，佢話今次係朋友請佢嚟住番晚，夜晚由朋友請客食中菜，唔會食葡國菜。問仙姐有冇玩番兩手碰運氣？佢話：「冇玩呀，我嚟睇吓啫，呢度真係好靚。」仙姐一臉慈祥，笑容滿面，睇嚟玩得好開心喎！