王晶<br>唔係拍套《色，魔》就企得住

王晶
唔係拍套《色，魔》就企得住

甚麼叫做成功？最簡單的講法，就是你做的事，得到其他人認同。王晶，可以講係香港最成功的商業片導演，20多年以來執導過的電影票房超過10億港幣，是「香港最高票房導演」，或者有人認為他是爛片王，今天上映的《七擒七縱七色狼》又是另一印證？但不得不承認，大部份香港人都有看過他的片，為他的「成功」出過一分力。王晶拍甚麼電影一切都由市場決定，從無因為要拍得獎電影而成為包袱，做人做到無包袱，可算是另一種的成功。

記者：張一豪
攝影：梁細權

集體回憶　七色狼是七金剛

訪問劈頭便是「呢幾年明顯開少咗戲，因為近年電影市場嘅定位好難定得準確，好難捉路，寧願唔拍，點可以亂開戲？」由始至終，晶哥都好清楚，拍戲，並非他一個人的事。
「據我了解，睇過舊版《七》戲嘅人唔多，但聽過或者睇過部份片斷嘅人就有唔少，因為個片名好特別，所以好多人記得，但其實呢個片名都係抄當年有一系列意大利嘅《七金剛》電影，而第3集係《七擒七縱七金剛》，當時正值粵語片末期，寶珠已退出，芳芳亦差唔多，雪梨又嫁咗唐佳，剩低就只有家燕做女主角，狄娜亦算係當時比較有名，再借用《七金剛》做噱頭，改成呢個片名，令到觀眾容易入腦。」

■「拍片唔係我一個人嘅事，係慎重嘅投資！點解想我拍得獎電影，都唔係我專業。」

「我通常係片名勁過部戲」

以為淫名一個，不是晶哥說穿，也不知《七》片名有這一段古。「正因為呢個戲名多人知，所以新片就用。雖然好有三級片Feel，海報又性感，但其實你哋好多時都見到我嘅電影海報同部片名，通常都勁過部戲。
舊版係處境喜劇，講一班人喺一間屋入面想索狄娜油嘅故事，最後譚炳文都有同狄娜Kiss，我呢部戲連唯一家棟同瑤瑤嘅Kiss戲都剪埋，我要同瑤瑤製造一個Untouchable嘅感覺，加強佢性感形象嘅Impact。今次部戲最Sexy就係瑤瑤嘅比堅尼，入面班色狼個個都得個睇字，同當年福星片一樣。新戲入面，除人物服裝懷舊外，仲會睇番好多粵語片、福星片、追女片嘅橋段，近年流行集體回憶，呢個亦成為戲入面嘅賣點。」

■父親王天林是六、七十年代香港著名電影、電視導演。

■去年獲香港電影評論學會最佳編劇獎。

■《精裝追女仔》親上陣，王晶從不怕爛。

劉翔唔會去跑3千

「我自己導演大概90部片，連監製大約160部，唔會有邊部話特別滿意，每一部都只會由商業角度去考慮，你知唔知80年代開始到𠵱家投資電影嘅人，只有5分1人賺錢，5分4人係輸，你無辦法唔從純商業去考慮。好似《賭神》，兩集都破咗香港票房紀錄，我都係由人物賣座元素去考慮，另加入一啲大喜大悲嘅背景去襯托人物嘅高低起伏，仲要有喜劇元素，一部成功嘅賣座片，無論是悲是喜，都要牽引到觀眾情感。
「好多人都問過我會唔會打算拍啲攞獎戲？我點解要咁做？劉翔會唔會去跑3千？梗係要做一啲有信心嘅嘢，點解要做啲無把握嘅呢？電影都有好多專業㗎！我喺其中一個專業上面做到頂點，唔通又走去做另外一邊？佐敦轉去打棒球都唔成功啦！你話我做咗咁多年電影，經驗咁豐富，點解唔可以利用我對電影嘅認識同專業，去拍一啲得獎戲？呢啲都係你哋一廂情願諗出嚟嘅啫！我有時間，都可以去做其他唔一定同電影有關嘅嘢。」

■晶哥看上孟瑤的是一張純純的臉孔。

■志偉片中名句：「淫人妻女笑呵呵，自己個女就要遮住對波。」

《色，戒》不變《色，魔》

呢期《色，戒》話題好勁，你會唔會開呢類嘅戲？
「《色，戒》好唔同，唔止因為三級引起話題，李安嘅誠意亦好重要，之後唔係拍套《色，魔》出嚟就可以企得住。拍嘢唔係跟風就得，要睇市場同埋個題材被炒熱嘅原因。市場有需要咪拍，當然我哋會做Research，就算呢一刻得未必下一輪掂，我部新戲如果今次掂咗，未必一定追續集，因新鮮感會打折扣，或者抽番當中比較好嘅元素再開第二部，講到底，都係睇市場，計過數。」訪問過程無算過晶哥提過幾多次「睇市場」，但每個答案都同市場扯上關係，得獎，從無成為拍片的條件，最重要是老闆同觀眾，市儈定襟撈，隨便你怎說。

晶女郎不是隨便捧出來

選「晶女郎」首要條件是有性格，孟瑤被力捧，皆因她「純」。
「如果本身無獨特Character，根本無可能捧到佢出嚟。近年來好似無乜性感女星可以突圍嘅原因好簡單，因為我呢幾年都無捧過人，特別係行性感，唔係個個都可以成功。我第一次見瑤瑤，就發現佢身材好，有行性感嘅條件，但最突出就係有一張好純嘅面孔，如果佢風情萬種，我反而唔會叫佢行性感，因為要人記得就要有SomethingDifferent。舒淇係一個好特別嘅例子，佢個樣可以話係一個好奇怪、非一般嘅性感，佢贏嘅都係特別Character。當年邱淑貞得，都係由喜劇女星開始，但佢本身又係有性感條件，所以嚟一個突破，畀大家驚喜原來佢走性感仲勁喎，咁樣，又跑出嚟。你睇劉嘉玲，《自梳》個造型本身係一個最含蓄嘅，反而成為佢最令人印象深刻嘅角色，都係同一道理。」

■80年代中開創「追女仔」系列電影，《精裝追女仔》一拍多輯。90年代開拍不少三級電影成最賣座三級片導演。

■Classic海報之一《赤裸羔羊》，亦令邱淑貞成功轉型。

■李麗珍憑純情三級形象成功上位。

■求學期間已在無綫兼職，曾為《歡樂今宵》撰稿。電視劇《千王群英會》為日後拍如《賭神》等賭片爭取不少經驗。

■81年起轉投電影，首部執導電影為《千王鬥千霸》。

■《最佳損友》是追女仔系列的變種。

「峯」芒……已露

大約一年前王晶北上揀蟀，找了孟瑤試試，當時問了一些她的情況，然後就叫她轉一個圈，不夠半個小時就試鏡完了。
「其實我在國內都有拍過電視劇和電影，都是做主角的，最深刻是拍電影《銀飾》，我演一個發現丈夫原來是同性戀的少奶奶，劇情需要我作性感演出，當時的壓力都好大，演戲我畢竟不是科班出身，未有受過正式的訓練，所以每日都好投入角色，老是想主角因為丈夫同性戀而令自己要紅杏出牆的心態，每日都怕自己演得不好，幸好導演鼓勵我，說如果我拍得不行，也不會收貨。」其實瑤瑤的演技，在內地都被肯定了，今次來到香港拍喜劇，反而輕鬆多了，最大壓力，都是來自大家對她的期望。
訪問完後翻查，原來《銀飾》的故事相當大膽，聽說因為內容太激，在內地禁映了，不過卻在05年《日本國際東京數位電影節》中，獲「最佳技術獎」，而後來推出的DVD版更以孟瑤的露點演出而大加炒作，晶哥想塑造的Untouchable女神，原來已經大露「峯」芒了。