唔經唔覺，存保制喺香港都實行咗一年，萬一唔好彩銀行出現問題，甚至摺埋，小存戶有冇足夠智慧唔去擠提，就視乎佢哋對呢套制度嘅認識有幾深。
存保會之前做咗個調查，數據顯示市民認知程度普遍都算滿意；但亦有唔少環節，反映市民對存保計劃有唔少騎呢誤解同埋「憧憬」，連存保會總裁李令翔都搖晒頭。
好似調查顯示，只得三成受訪者知道，存保計劃係保埋外幣存款；又有兩成幾受訪者以為，放喺銀行嘅淨額存款（即係扣咗欠銀行貸款後嘅存款額），就算低過十萬銀保障上限，賠嗰陣都會攞足十萬賠償上限。唔通真係有啲咁天真嘅市民，以為刀仔鋸大樹，放低幾嚿水喺銀行，博佢冧檔有錢賺？
存保制自推出以嚟，喺全港搞過41場展覽，包括喺屋邨踩場，不過，草根階層要顧住搵食，邊得咁好耐性聽埋啲咁複雜嘅講解，所以存保會都要丑盡六壬，落區時玩遊戲、送贈品，達到教育民眾嘅目的。