提起網上戰爭遊戲，話題總離不開《RainbowSix》系列，佢唔用明槍，只玩暗鬥，邊個對地形比較熟識，邊個就贏！同樣係OnlineGame，但《Warhawk》就熱鬧好多，除咗地面步兵，你仲可以選擇空軍戰機或陸上坦克，約齊32人同時作戰，仲熱鬧過八國聯軍！唯一欠缺，呢隻遊戲尚未提供海軍畀玩家選擇，想揸潛艇或航空母艦？等下集啦！
記者：陳國輝
32名網友互相廝殺
多人對戰元素當然唔少得！《Warhawk》提供Offline及Online兩種模式，前者提供1-4人同時參戰，可選擇聯盟，也可以做敵人。當正式埋位玩，視乎參戰人數，畫面會分割成二分之一或四分之一格，假如屋企部LCDTV冇番咁上下Wide，效果或差強人意。至於Online模式就唔使擔心呢個問題，最多可容納32人互相廝殺，最特別係支援藍芽耳機，畀你同盟友互通訊息，制定作戰方案！唔少Blog友仲喺討論區上廣發「戰書」，約埋時間齊齊開片，夜闌人靜最多人玩，唔使身水身汗打WarGame。
空軍靠六軸掣逃亡
PS3剛宣布11月推出震掣「DUALSHOCK3」，雖然可Support的遊戲尚未推出，但對應六軸手掣嘅遊戲仲有大把，《Warhawk》係其中之一。除傳統方向掣，玩家還需借助六軸體感，嚟遙控戰機嘅升降和左右傾斜；如果你揀陸軍，亦可以用嚟操作坦克及吉普車等行軍方向。有網友建議，大家應該勤於練習，尤其駕駛戰機嗰陣，皆因你一旦被敵人攻擊炮Lock死的話，除咗要立即解除封鎖，還要作出不規則繞圈，防止被炮彈擊中。為求成功逃脫，玩家必須熟習點樣控制戰機傾斜擺動。
陸軍用炮台作據點
遊戲嘅戰爭模式主要分為三種，包括空對空、空對地以及地對地。喺一般玩家心目中，可能覺得揸戰機就一定最着數！不過，《Warhawk》亦有為陸軍士兵「考慮」，戰場上會出現好多炮台，一旦成功佔領，你就可以輕鬆地瞄準任何戰機發炮，佢都算係空中霸王嘅剋星；另外，於地面戰中玩家也可選擇以坦克、吉普車甚至徒步對抗敵人，每種武器都有自家特色，點先可以發揮得最好，就要講求你同隊友間嘅合作喇！
講乜先？
故事發生於1940年代，《Warhawk》講述Eucadian與Chernovan兩大陣營為爭奪勢力範圍而展開嘅戰爭，但與同一時期的第二次世界大戰史實無關。講到戰爭，係咪需要招兵買馬，行軍遣將？通通都錯！《Warhawk》係一款動作遊戲，挾PS3機能，你會體驗到熱鬧嘅戰爭場面，以及全3D所構成嘅街道、橋樑、山丘、河川、海洋，與一般戰棋遊戲，不能相提並論。
另類打法：匿埋暗殺！
雖則《Warhawk》大玩熱鬧戰爭場面，然而想更易MissionComplete，有專家就提出策略，建議不妨學《RainbowSix》咁，以埋伏、暗殺等非正面攻擊為主。選擇陸上步兵的話，不妨多用狙擊槍，匿埋安全地方，靜觀敵人出現，不過呢招龜縮打法有啲悶，啱用與否見仁見智。
《Warhawk》PROFILE
機種：PS3
類型：多人對戰動作遊戲
遊戲人數：2-32（網上）/1-4（離線）
操控：SIXAXIS手掣
語言：中/英
售價：$348