李安的《色，戒》未上畫先轟動，不少人都對這部電影好奇，因為過往改編張愛玲小說而拍成電影的，反應各走極端，其實要改編張愛玲小說，難度究竟在那？
曾多次把張愛玲作品搬上舞台的香港著名戲劇編導林奕華（圖），日前接受本報訪問時表示難度主要在於媒體本身的局限性：「張愛玲小說裏嘅角色有好多人性弱點，佢哋嘅處境同現代人好相似，但當呢啲小說人物要立體被描寫，我哋先體會到同佢哋嗰種親近，電影電視劇就會好冒險，因為文字一兩句可以帶出嘅，用影像未必表達到。」
林奕華也認為觀眾對改編劇本的期望也是另一難題：「觀眾睇小說會有耐性，會主動發掘人物跟自己關係，會包涵同欣賞人物複雜性。相反，電影電視劇嘅觀眾係為娛樂而入場，電影用影像直接投射，唔討好嘅行為同對白，馬上令觀眾抽離，冇辦法同情或者代入，咁齣戲好難成為佢哋鍾意嘅戲。」
身為張愛玲小說擁躉的林奕華，對於李安改編的《色，戒》又有何睇法，他說：「電影過咗三分一，我已經冇再比較張愛玲同李安版本嘅分別。我覺得李安做緊嘅嘢對我哋係良性，因為佢提出緊一啲問題，通過佢嘅作品反照番我哋嘅生命。」