今日係中秋佳節正日，若果大家今日行入滙豐銀行分行，見到唔係着住制服嘅職員，而係一個古著嫦娥，同埋一個人扮嘅玉兔，千祈咪大驚小怪以為提前預祝Halloween。事關呢個係滙豐專登安排，用嚟慶祝中秋嘅「特別」節目。
滙豐話，中秋節想製造啲驚喜畀班客，所以安排咗半打嫦娥同玉兔，分3日去勻94間分行。咁即係每pair古裝人，平均每日要去十間分行，大熱天時兼逢落雨，你都咪話唔辛苦！
滙豐發言人話，呢啲應節人物，係真金白銀請返嚟嘅老臨，唔係銀行員工捱義氣扮嘅。佢哋見人就派月餅、稔柿同埋楊桃，足足派咗兩萬幾份咁多，又同啲客猜吓燈謎，搞到分行十足嘉年華咁款。