中午飲茶，碰到一位來自上海嘅食肆原材料（如芝士、調味品、餐酒、牛奶類產品等等）入口商，佢唔識講廣東話，左丁山唔識講上海話，講普通話佢又嫌左丁山發音不正確，於是講「國際語言」，英文是也，橫掂旁邊又有一位意大利女士係芝士專家，我哋成班人冇人識意大利文，唔講英文講乜嘢呀，意大利女士話啲英國人美國人恃住外國人識英文，自己唔肯努力學外語，係世界上罕有嘅「單一語言講者」。
碰啱呢日有段新聞講，香港總商會喺五月份調查，過半企業對本港僱員嘅語文能力表示不滿，而總商會提倡「三語言、三文化」人才，去邊處搵呀？所謂「三三」，即係精通中英文及一種外語以及熟悉中、港及國際文化。本港教育制度似乎難以出產呢類人才噃。
鬼佬R就以為商界得個講字，去到現實層面，畀薪水就唔會手鬆嘞。佢有一位德國朋友娶香港妻子，長期在亞洲工作，家中有兩個兒子，自小就在家中聽講德語、粵語，在香港讀國際學校，努力修讀普通話。大學畢業嘞，兩個仔到北京居住搵工，係真正三語三文化人才，但月薪只得四千元人民幣，打工兩年，兩個仔索性返回佢哋好陌生嘅德國打工，話德國方面工作時間短，福利好，薪水高。點解唔返回出生地香港呢？因為一般商行嘅薪水與福利亦唔算吸引。
上海入口商話在中國大陸推銷食肆產品，並不困難，只要搞掂大股東或大老闆，啲餐廳廚師、買手就一定會落單。但香港食肆就惡搞嘞，老牌食肆與連鎖店往往有長期供應商，往往採取一動不如一靜嘅態度，唔輕易向新供應商入貨，兼且佢以為香港有ICAC，唔敢以內地方法搞關係，故此碰釘碰到頭破血流，直至佢在網上睇到新聞，知道ICAC拘捕某大連鎖店嘅最高負責人，佢先至恍然大悟：「原來香港都有呢支歌唱，ICAC可以拉人，但買手可以講ICanAcceptCash！」上海人果然醒目，不斷吸收「新知」，但知道都冇用吖，佢話：「死啦，歐羅創新高，意大利乳酪產品成本創新高，兩把刀砍落嚟，我都唔知點樣賣貨！」