繼摩連奴俾車仔炒咗，睇嚟下個最有機會離任嘅英超領隊，都係熱刺領隊祖爾，日前佢啱啱同球會開完緊急會議，好似話祖爾已經接受咗球會開出嘅400萬鎊（約6,240萬港元）分手費㖭（雖然熱刺話冇咁嘅事）！唉，睇嚟佢留喺熱刺嘅日子唔多咯。不過你哋同佢定喎，聽講荷蘭足總嗰邊話明攬硬祖爾，隨時留番個國家隊位畀佢教，有後路怕咩啫！
鬥米堡成最後機會
嗱祖爾，唔好話個天唔畀機會你垂死掙扎，今晚英聯盃主場對住冇咗3件箭頭美度、艾利亞廸里同端基嘅米杜士堡，你仲係唔識贏就真係證明你冇料到喇！米堡𠵱家得番李東國一個正前鋒，而季初表現極搶鏡嘅中場艾卡又傷埋要唞兩個月，今勻熱刺起碼要入3、4粒先安撫到高層同球迷嘅心靈。家陣畀隻好牌你上，祖爾千祈咪再摸和過莊呀！過咗莊冇機會打多幾圈㗎喇！
不過講就咁講啫，睇見祖爾個樣好似定過抬炸彈咁，直頭汗都未出過一滴。冇㗎，話說周日場曼、車大戰，荷蘭國家隊教練尹巴士頓坐喺阿巴莫域治後排睇波，佢係咪教車仔暫時就冇人知，但荷蘭足總講明，如果尹巴士頓走人，一早預咗個位畀祖爾頂上，唔怪之得佢咁淡定啦，原來有後台撐腰！
隨時頂尹佬教荷蘭
如果我求大俠係祖爾嘅話，就老虎蟹都贏咗米杜士堡先，起碼證明自己仲有料到。試諗吓，對住讓半臂嘅米堡都贏唔到，第時假若教荷蘭國家隊邊有說服力？咪盞去到邊俾人彈到邊。祖爾，好好醜醜都做埋今晚場戲，畀自己落台又好點都好，至少挺起胸膛行出白鹿徑吖！