自從聯想（992）05年收咗IBMPC喺旗下，就一路行雙品牌（ThinkPad同埋Lenovo）路線，不過，一個係自己親生仔，一個係過繼嘅，難怪一直有傳聞話，聯想會淡化ThinkPad標誌，令Lenovo呢個品牌軟着陸。
帶親生仔衝出去
不過，唔知係咪諗過度過，自己生嘅唔及過繼嘅，華華噚日睇到《網易科技》報道話，聯想贊助嘅F1賽車，車身兩側Lenovo標記，被ThinkPad標誌取代，但Lenovo字樣就仲會出現喺賽車定風翼上面。下個月5號舉行嘅F1由上海站開始，聯想贊助嘅藍白相間F1賽車，都會換上最新標誌出賽。
聯想集團高級副總裁兼大中華區總裁陳紹鵬話：「喺中國上海站賽事突出ThinkPad標誌，係持續深化雙品牌策略嘅體現。」始終睇一級方程式賽車主要係歐洲人，由ThinkPad呢個仔帶住Lenovo見吓世面，可能仲好呢！