約李亞男（Leanne）做訪問，選美出身樣靚身材好之餘，最近仲行少少性感先至禾稈冚珍珠，伊人原來有一副驕人身段，唔知佢嘅DreamCar係咪都係一啲外形勁有線條又或者超跑之類嘅車呢？點知經理人嘅回覆係LandRover！聽罷反應係「吓？」我完全想像唔到天使臉孔魔鬼身段嘅Leanne，居然鍾意粗獷講實用性能嘅四驅車。究其原因，竟然係揸住部車幾粒鐘去Shopping都夠安全兼擺得晒所有戰利品囉！
記者：梁美甜 攝影：譚盈傑
鳴謝：BeautyTech
性能實試
Leanne為了進一步「了解」Freelander2嘅性能，仲自告奮勇咁坐番轉測試一下呢部新車係咪如佢想像中咁Fit。行斜走石路再跑沙灘同海邊番嚟嘅Leanne四個字形容晒，「興奮到暈」不過又不失儀態，不愧係選美出身兼摘冠嘅人，好欣賞！
揸幾粒鐘車去掃貨
Leanne貴為05年華姐冠軍，初以主持身份出現，覺得佢好斯文成熟，直至最近先發現Leanne身材比同屆嘅陳法拉更有睇頭，怪不得能奪冠啦！Leanne卻嫌自己生得高大，坐親車都嫌內櫳逼狹，跑車款單係望已經覺得好唔舒服，莫講話坐上去，所以自12歲開始見到型格四驅LandRover就已經認定為至Match車款，「四驅車普遍頭頂空間夠，我手長腳長梗係揀番架可以坐得舒服嘅車啦！」唔單止咁，四驅車空間夠又大部都係冧到Leanne嘅原因。「我好鍾意周圍去玩去旅行，喺加拿大時每逢周末就去打Golf，有假期仲會成班人去露營同滑雪，連Shopping都唔介意揸幾粒鐘去美國西雅圖㖭，美國稅率低啲嘛！」怪不得非四驅不可啦，無論係玩定掃貨都好，一大堆Gear或者戰利品，部車無番咁上下大又邊夠坐人同載嘢吖！「唔止！四驅馬力大兼安全，尤其係LandRover，連英女皇去打獵都要坐佢就知佢安全兼實用啦！」
無牌情傾大嚿「車」
印象中好多喺外國長大又或者浸過鹹水嘅人，一到法定年齡就已經急不及待跑去考車牌，一來係實際需要，二來外國買車同養車都比香港平；反觀Leanne再一次打破我嘅既有觀念，「喺加拿大由細到大都有屋企人接送，自己唔覺得有揸車嘅需要，直至我20歲，諗住學多一技旁身，先至去考筆試，到要考路試嘅時候咁啱撞正選華姐，所以錯過咗，到𠵱家都未考到個牌。」所以嚴格嚟講，Leanne絕對係一個無牌但可以喺外國揸車嘅人，事關係外國只要通過筆試之後，有一個有牌嘅經驗駕駛者坐係身邊就揸得車。「所以Volvo、Benz、BMW等都揸過，我始終都係鍾意Jeep仔，尤其係LandRover，英女皇都御用打獵Picnic用，絕對信得過！」而Leanne對於LandRover2007年款式嘅Freelander2更加一見傾心㖭！
至愛安全性能好
「我幾怕揸車或坐車時撞車，不過Freelander2夠高身，視野夠廣，就算行彎路石路都好穩，避震仲好好㖭！」當然啦，Freelander2搭載咗新一代TerrainResponse地形反應系統，透過電子控制系統同埋循迹防滑系統，喺唔同路面情況之下都提供到最大嘅抓地力。廠方仲強化Freelander2嘅安全，新車配備咗智慧型電子中央離合器、EBA煞車強度輔助系統、ETC電子循迹防滑控制系統、CBC轉彎煞車控制系統、DSC車身動態穩定系統同RSC防翻滾轉穩定控制系統等，提供全方位嘅安全同保護。安全性同越野性能毋庸置疑，但講速度就稍遜，四驅大車得3.2公升兼配18吋軚起跑以至加速反應相對於同級歐洲車略遜。
一見鍾情 嘩嘩聲！
我信，信Leanne真係LandRover嘅粉絲，仲係超級嗰隻。佢第一眼見到Freelander2：「嘩！真係LandRover呀！不過呢部望落去細啲、線條靚啲，應該好啱女仔揸！」無錯，Freelander2比上一代更精緻而近似家族品牌車款，因為原廠設計Freelander2造型時，保留原先精巧而適合鬧市用嘅車身尺碼，同時融入Discovery3、RangeRoverSport等嘅設計元素，所以Freelander2外觀上比上一代精緻又不失LandRover嘅特色。Leanne繞住部車又看又摸笑得鬼咁開心，仲急不及待走上車坐，呢一刻嘅佢開心得猶如吃到糖果嘅小女孩。「頭頂有位剩，再高都唔怕頂呀！嘻！有天窗好，感覺好開揚，順便曬吓太陽㖭。後座好闊，啱我開工時換衫同擺嘢。咦？有咁多置物位咪可以放好多零碎嘢囉、個尾箱仲可以……」我和攝影師見到都忍不住笑了出來，因為Leanne實在太可愛，同螢光幕見到嘅斯文女主持好唔同，純真親切得多。
LandRoverFreelander2規格
引擎：3,129c.c.直六
馬力：233ps/6,300rpm
扭力：32.3kgm/3,200rpm
傳動：六前速電子手自排變速，智慧型全時四輪傳動
價錢：$430,000
查詢：LandRoverHK（27132383）
