上個禮拜，我哋特區空氣突然變得非常混濁，能見度暴跌。喺上個禮拜之前，由山頂老襯亭望出去，絕對望到獅子山。不過，上個禮拜就連中環都望唔到。
坊間當然傳來好多解釋方法。最精采嘅，就係有人話特首曾蔭權喺前個禮拜五，話空氣質素已見改善，而天神覺得特區高官「篤眼篤鼻」，所以就懲戒佢。情況有少少似《壹週刊》楊懷康社長話齋，喺幾個月前，前特首董建華突然接受訪問為自己平反。點知訪問之後冇幾日，天神就跌架昂坪360纜車落嚟，懲戒吓佢一樣。
污染自華南吹嚟
呢啲咁迷信嘅解釋，孫柏文其實係信嘅，番書仔又點？寧可信其有。不過為求滿足嗰啲吓吓都話需要「科學根據」嘅人，我就做咗啲功課。
其實，如果要知道點解空氣突然變得非常混濁，睇番我哋《蘋果日報》報道就得。引述地球之友環境事務經理朱漢強，佢一矢中的咁話：「香港根本理唔到內地交通同電廠排污問題，佢（曾蔭權）咁講係出口術亂噏！」冇錯，啲污染係從華南地區吹嚟。
去到呢度，孫柏文想問：「陸恭蕙，你喺邊？點解唔講嘢？」
再問：「陸恭蕙，思匯政策研究所，去咗邊？點解唔講嘢？」
我要問呢啲問題嘅原因，係因為思匯早前大大聲話：「香港本身係最大嘅空氣污染源頭！」仲要攞好多分析出嚟。佢哋話一年365日當中，逐日逐日計，香港本身係最大污染源頭嘅日數最多，所以得出佢哋嘅結論。
問題係，如果有200日藍天碧海，不過喺嗰啲日子，香港本身係最大污染源頭，再有165日空氣好似上個禮拜咁混濁，不過從華南地區吹嚟，對陸恭蕙嘅思匯嚟講，「香港本身係最大嘅空氣污染源頭！」所以，思匯根本係完全硬膠！
捉錯用神仲危險
大家都知，特區有鬧之不盡嘅硬膠，所以可能想知點解今日要鬧思匯同陸恭蕙。理由係，佢哋係特強膠，破壞力特強嘅硬膠。因為傳媒二話不說咁接受佢哋嘅結論，政府當時就話會推行一連串針對特區境內「有效」嘅政策。勞民傷財都算，最弊係因為思匯嘅結論，政府對付空氣污染嘅注意力放晒喺特區境內，從華南地區吹嚟嘅污染就被完全忽視。
思匯想環保，不過最終令我哋面對多咗危險污染。仲唔係環保硬膠？
金手指網誌： http://phatdat.blogspot.com