《阿森一族》（TheSimpsons）係全球好多Kidult嘅至愛卡通片，但主角不外乎大仔巴特同聰明女麗莎等，睇得多的確有啲悶，所以有韓國網友就將佢哋黃皮膚兼冇下巴嘅特質，配落唔少經典漫畫、名畫甚至韓國紅星度，出嚟嘅效果都幾好笑。
阿森版殺氣全消
漫畫《死亡筆記》嘅阿森版本最抵死，阿Deep睇見死神流克同雷姆，唔單止感受唔到佢哋股殺氣，反而覺得平易近人。相反，彌海砂就變得面容扭曲，以為佢先至係大反派。哈利波特（HarryPotter）嘅遭遇都係一樣，阿森版佛地魔只係得隻鬼手，猙獰樣貌消失得冇影冇蹤。
網友又將米高安哲羅（Michelangelo）名畫《創世記》，同挪威畫家蒙克（Munch）嘅《吶喊》擺上枱，但睇落老竇荷馬個樣，似搞笑多過驚慌。至於韓國人氣組合東方神起同SuperJunior都有阿森版本，不過阿Deep都唔明點解神起五子變成阿森嗰樣後，竟然會似中坑。
網址： http://kr.fun.yahoo.com/NBBS/nbbs_view.html?bi=1201&mi=620758
版主：網盜王尊尼Deep
本欄逢周一至五刊出