好多名牌貨喺中國內地賣得好貴，但喺美國就平一大截。網友多羅羅喺《新浪北美論壇》話：「同一對意大利皮鞋，喺美國賣50美金（約390港銀），但喺內地就要成1500蚊人民幣（約1550港銀）。平治E-320房車美國賣5萬美金（約39萬港銀），去到大陸就要98萬人民幣（約101萬港銀），究竟因乜解究？」
198.22.236.x回應：「消費結構唔同，中美兩地嘅物價好難互相比較。中國人鍾意追求名牌，世界各地嘅名牌貨，一入到大陸就會炒到好貴。美國人冇咁崇尚名牌，只有少數美國明星或者富豪追求名牌，所以，當地名牌貨冇中國咁貴。」
208.179.210.x講：「中國人通常認為，外國月亮特別圓，所以任何『來路貨』喺大陸都會賣到好貴。不過，有啲中國貨喺外國亦好受歡迎，例如中國蠶絲雖然喺大陸賣得好平，但美國人當係寶。」
75.33.138.x話：「美國部份服務嘅收費，其實都好揦脷，例如照一次胃鏡要1200至1500美金，X光起碼85美金。」
英國《經濟學人》最新「生活質量指數」調查發現，全球183個國家中，排頭20位嘅，幾乎全部喺歐洲；亞洲只有日本入圍，排第7。美國係第8名，中國未能打入頭20位。呢項調查係根據平均收入、兒童福利、健康醫療、平均壽命、謀殺案等200項指標進行評估。