喺中秋節上映嘅笑片《七擒七縱七色狼》，當中一班演員包括孟瑤、童愛玲、林家棟同王祖藍等，噚日去到奧海城宣傳，女主角孟瑤雖然打扮密實，但係佢即場同幾位男演員跳舞同玩遊戲餵食水果，表現非常落力，難怪王晶話要力捧佢做性感女神。當孟瑤攞起把刀切生果，王晶就緊張到企出台前叫佢小心，仲緊張過對住自己個女。
唔敢全裸怕嫁唔出
玩遊戲期間，孟瑤主動用口餵在場嘅男演員食水果，喺佢餵完王祖藍食提子之後，林家棟又抱起唔夠高嘅祖藍餵番伊人，之後孟瑤又托住祖藍跳舞，搞到王祖藍都有啲尷尬。祖藍話估唔到對方會咁做，佢話平時都唔夠膽咁貼近戲中女演員，因為佢哋個個都好鬼性感，要盡量同佢哋保持距離咁話！
今次王晶呢部作品同期會同梁朝偉「傾囊」演出嘅《色，戒》打對台，孟瑤話自己暫時都未有心理準備好似湯唯咁做到全裸演出，佢話怕到時做咗驚自己嫁唔出喎！
