近年觀眾習慣咗恐怖片中典型嘅陰森同驚嚇，似乎黑夜嚇人已經冇晒新意，由電玩搬上大銀幕嘅《生化危機》系列最後一集《生化危機3絕種生還者》（ResidentEvil：Extinction）就一反傳統，將戰場移到日光日白嘅沙漠，仲注入西部牛仔元素，全片耗資一億美元（約7.8億港元），將拍攝規模、特技製作同視覺效果推到頂峯，誓要比前兩集更厲害！ 撰文：戶川淳
下月4日上映嘅《生化危機3絕種生還者》，劇情延續上集故事，女主角美娜祖維華茲（MillaJovovich）成為遮天集團生化實驗改造嘅試驗品後基因突變，擁有超乎常人嘅力量、強烈嘅官能感應同敏捷嘅身手，佢仲會匿埋喺那維達沙漠準備隨時反擊。
換上野性裝束
今集美娜會同人氣劇集《Heroes》靚女雅莉娜達（AliLarter）飾演嘅生還者，以及美國黑人R&B性感女歌手Ashanti扮演嘅護士等人組成軍隊，喺日光日白嘅沙漠聯手打喪屍，仲打算大舉殲滅將人類變成活死屍嘅致命病菌。雖然《生化危機3》係續集片，不過已經好有腦咁一方面延續原班人馬嘅特色，同時又打造全新感覺。今集女主角美娜將更具野性魅力，唔再着住第一集套紅色超短裙，亦都拋棄咗上集嗰件緊身皮衣，改為以低胸裝加熱褲嘅沙漠牛仔裝束激發野性美。
喺烈日當空下望住無邊無際嘅沙海同無數喪屍，絕對比夜間突如其來一聲尖叫更令人毛骨悚然！導演都知道一班fans等咗三年，點可以咁求其，片中特別加入最受《生化危機》fans歡迎嘅怪物Tyrant，當然唔少得嗰班變種狗啦！
視覺效果夠照
為達到最佳視覺效果，製作單位重金禮聘多位極富經驗嘅設計師，將電玩世界變成真實，展現喺觀眾眼前。負責創作戲裏喪屍怪物造型嘅PatrickTatopoulos係行內享負盛名嘅設計師，佢參與創作嘅電影多不勝數，當中包括《智能叛變》（I,Robot），《天煞地球反擊戰》（IndependenceDay），《異獸戰》（AVP：Alienvs.Predator）等科幻大片，連《盜墓迷城》（Mummy）同《絕世天劫》（Armageddon）嘅視覺效果總監EvanJacobs亦傾力參與製作。
幕後小八卦：沙漠拍戲 玩殘自己
由於《生化危機3絕種生還者》大部份時間都喺沙漠拍攝，製作難度亦加倍升級。當地氣溫長期超過攝氏54度，喺咁嘅環境下，唔單止係人，就連冇感覺嘅機器都唔能夠適應，而且沙漠上嘅大風沙會破壞劇組悉心搭建出嚟嘅場景，導演亦擔心女主角美娜祖維華茲會被猛烈嘅太陽曬親，所以唔使埋位嗰陣，美娜實有專人擔遮服侍。