由張愛玲小說改編而成嘅電影《色，戒》，噚晚喺中環國金中心舉行首映禮，兼為香港大學籌款。星期二至公開放映，唔少「張迷」都等得好心急，因為之前《傾城之戀》、《半生緣》同《紅玫瑰與白玫瑰》改編成電影，都係毀多過譽，要將張愛玲濃得化不開嘅文字變成影像，真係好考導演同演員功力。
其實張愛玲同香港好有淵源，佢當年喺上海中學畢業，原本打算去倫敦大學留學，但歐戰爆發，於是喺1939年嚟咗香港大學讀文學，住喺OurLady'sHall女生宿舍，成績名列前茅，攞過何福獎學金。
部份名作背景是香港
可惜1941年香港淪陷，張愛玲被迫停學，喺大學醫院做臨時助護，照顧傷兵，後嚟佢將呢段經歷寫咗篇回憶文章《燼餘錄》，用抽離嘅筆觸寫出戰爭嘅冷酷同荒謬。1942年張返回上海，開始寫小說，部份名作以香港為背景，包括《傾城之戀》、《沉香屑─第一爐香》，有一篇《茉莉香片》更係寫港大中文系學生嘅。之後張愛玲認識咗令唔少「張迷」恨之入骨嘅漢奸丈夫胡蘭成，佢創作《色，戒》嘅靈感，當中唔少係自己同胡蘭成愛恨交纏嘅影子。1952年佢以到港大繼續學業嘅名義申請來港，其間幫電懋電影公司寫咗好多劇本，可以話係香港電影業嘅前輩，後來至離港去美國定居。
《色，戒》電影雖然有唔少男女主角梁朝偉同湯唯肉帛相見嘅鏡頭，係一套三級片，但係港大校長徐立之同多位教職員噚晚都去捧「舊生」張愛玲場。民政事務局常任秘書長尤曾家麗都有入場，佢話自己身為張愛玲師妹，好想欣賞吓師姐呢部充滿自傳色彩嘅作品。港大退休教授楊紫芝更話睇三級片唔尷尬，佢好鬼馬咁話「到時我瞇埋雙眼咪得囉！」
下月將展出珍貴手稿
今次《色，戒》上演，估計又會再吹起一次張愛玲熱，港大圖書館下個月會舉辦一個張愛玲展，展品包括一篇名為《談色，戒》嘅文章珍貴手稿，但係展覽只畀校內人士參觀，港大話稍後會再考慮係咪開放畀公眾。