中環甲級office租金有幾貴，睇怕都唔使華華多講，JF資產管理喺怡和大廈間門市，足足有成廿年，87年開張嗰陣，幢大廈仲叫康樂大廈，咁多年畀嘅租金，真係天文數字。
喺呢間門市做咗11年嘅零售業務及客戶服務總監張嘉駒同華華講，個市升定跌，只要睇吓啲客入舖時嘅表情，就可以一清二楚。佢最記得98年金融風暴時，除咗要日日call客滙報市況，仲要同佢哋做埋心理輔導，撈埋社工嗰份。
日日上去投訴
至於最深刻嘅一個客，亦係喺98年時出現。話說一個買咗印尼單一市場基金嘅客人，當時落咗「柯打」要沽貨，點知咁啱印尼政局不穩，個基金經理Close咗隻基金，唔畀贖回，個客於是日日上去嘈同投訴。不過，一個星期後，政局穩定，隻基金重開，個客成功出貨，個價仲高過之前，之後個客仍然日日嚟，但就係嚟saysorry，嚟足一個星期。