同事寶寶去咗東非成個月，上星期終於喺肯亞返嚟，我哋幾個八妹第一時間圍住佢問吓非洲風情，有冇艷遇咁啦。點知一係唔問，一問佢就把幾火，大大聲話有嘢要投訴。
平時都算大方嘅寶寶，佢話上個月中起程之前，去咗恒生銀行換咗千幾蚊美鈔，腰纏萬貫咁飛去非洲肯亞Kenyatta國際機場，落機後排隊做落地簽證，排咗成粒鐘輪到佢辦手續，跟手畀50蚊美金簽證費。點知見關員揸住張銀紙驗屍咁驗，臉色一沉遞返張銀紙畀佢，話佢哋唔收1996年發行嘅美鈔。寶寶話都唔知發生乜嘢事，好彩摷到張其他年份嘅美金，咁先順利過關。
寶寶又話，第二日佢去當地找換店換當地貨幣肯亞先令，點知職員一見到係96年嘅美鈔，就指住告示牌，上面寫住曾出現1996年美金偽鈔，兌換該等紙幣兌換率會較低，「原本1,000蚊美金可以兌成66,000先令，但張1996年只得62,000先令，折算港幣計，少咗500幾蚊港幣呀!」
寶寶越講越嬲，話仲俾同行嘅美國人「寸」佢點解唔知96年嘅美鈔有問題，咁蠢仲要換，「我點知恒生咁大間銀行，會換啲有爭議嘅美鈔畀客啫，兌少咗錢事小，入唔到境事大。」恒生銀行嘅職員呢幾日嚟一直都冇覆寶寶，難怪寶寶氣難下。各位姊妹記住，第時兌換美鈔都要醒醒定定。
逢周一至周四刊出