美國新移民舊年增至3750萬新高，佔全國人口13%。值得留意嘅係，嚟自亞洲嘅移民學歷好高，而嚟自拉丁美洲嘅就冇咁好。有網友喺《MSN討論區》話：「拉美裔移民，普遍學歷低，惟有做啲低薪工作。」
拉低晒啲工資
bunchargum講：「我睇唔過眼啲美國人，經常歧視低技術工人，計我話，職業無分貴賤，如果冇人肯去快餐店洗碗、洗廁所，或者去農場耕田，咁呢啲工搵邊個做？拉美裔移民抵得諗，先至做呢類工，對美國經濟其實有好大貢獻。」
PatrioticStablest講：「美國商界需要一班低技術、低薪工人，加上美國政府冇盡力，阻止非法移民入境，所以，好多拉丁美洲人嚟美國打工。不過，有啲拉美裔移民亦幫唔過，佢哋拉低晒啲工資，令土生土長嘅美國人冇啖好食，美國政府亦收少好多稅。仲有，啲非法移民，享受各種社會福利，令中產階級同有錢人要交多啲稅。」
亞洲移民學歷高
喺美國，約48%亞洲移民（主要係中國人同印度人），擁有起碼一個大學學位，比率高過土生土長美國人嘅27%。至於嚟自拉丁美洲嘅移民，只有11%大學畢業。