啱啱過咗個周末，敏妮聽得最多嘅冧巴係「388」，冇錯就係港交所（388）。星期五晚去咗契大佬Kenny老細喺灣仔新開嘅「私竇」飲wine，講開上個禮拜敏妮話，家陣要「大價股當股仔炒」，佢好激動咁話，「敏妮，今日隻港交所『應』晒你講嘅，大價股當股仔炒理論，直情可以炒即日鮮。你話如果今朝一開市就掃10萬股，臨收市嗰陣放，唔使多，一股賺25蚊，一日都賺層樓返嚟。」
睇升但怕高追
當然敏妮唔敢低估Kenny嘅實力，但掃10萬股港交所，以周五港交所最低個價195.7蚊，埋單唔計交易成本，都要1957萬銀，Kenny個經紀，肯唔肯同佢掃都成問題。另一個問題係，做任何投資，最重要係為自己預備一道「逃生門」。你有賺250萬嘅希望，亦要有輸250萬嘅心理準備，要「坐」10萬股港交所嘅「貨」，唔係講笑。
「空手入白刃」當然危險，不過，敏妮有一手半手貨喺手，又想博一博，令計劃中嘅年尾英國睇波團可以有多啲盤川，股王A幫敏妮出咗個主意──買輪！
以敏妮手上嗰一手港交所為例，賬面賺咗萬五蚊，雖然中長線仍然睇好隻股會升，但買多手始終有高追嘅感覺，但得一手又覺得唔夠，所以股王A建議敏妮，小注買港交所窩輪，就攞幾千蚊出嚟買輪，睇短線，就算一個唔好彩，蝕都係幾千蚊，但如果真係如敏妮所願，窩輪嘅槓桿效應就令到敏妮可以「刀仔鋸大樹」。
本意平衡風險
敏妮教人買窩輪，聽落同呢個欄一貫風格好似唔係咁夾，但其實窩輪呢類衍生工具，本來就係用嚟平衡風險，只係好賭嘅人買單邊，將原本用嚟平衡風險嘅工具當做賭具。
http://manlitalk.com/blogs/