中文大學噚日同諾貝爾物理學獎得主楊振寧教授慶祝85歲生日，向佢送出一份與別不同嘅禮物，就係喺校內豎立一尊楊振寧銅像。楊教授噚日春風滿面，同記者由學術研究、國民教育，講到中美學生比較，又講到佢雖然係個傑出科學家，但亦有計錯數嘅時候。
曾搞錯生日日期
原來噚日並非楊教授嘅生日正日，何解？原來少年楊振寧喺上個世紀二十年代出國留學時，辦理手續要填出生日期，但嗰個年代一般人都係記農曆為主，於是計吓計吓，就填咗「九月廿二日」為西曆出生日期，到後來翻查萬年曆先知計錯數，楊教授嘅西曆生日係10月1日至啱。除咗生日，原來楊教授有好多重要論說亦係喺10月1日發表，所以特別有意義。
至於佢太太翁帆噚日都係全程陪伴，雖然被問到兩人關係時，楊教授已經一改以往唔想講嘅態度，不過仍然有啲羞澀，聲音突然細咗一截，話兩口子相處得好好，仲因此令佢更了解年輕一代嘅想法。
今年亦係楊振寧同李政道獲得諾貝爾物理學獎50周年，講開李政道教授，佢現任美國哥倫比亞大學全校級教授，北京早前亦為佢舉行專題研討會，兩人仍然地位超然。