嘉里建設（683）喺九龍灣嘅紅噹噹旗艦商場MegaBox，話晒佔地110萬平方呎，要全部出租兼裝修好，真係有排搞，最近終於有啲規模，嘉里梗係趁機大鑼大鼓造吓勢。
主席親身撐場
噚日搞嗰個開幕禮，順便晒吓自己嘅優點，地點唔係一般中央廣場，而係喺十樓嘅國際標準溜冰場舉行。十幾個少男少女踩住冰舞龍，難度媲美梅花樁。雖然係星期日，但係集團重頭戲，主席洪敬南都親身撐場。大會仲遠道請嚟世界花式雙人溜冰冠軍申雪同埋趙宏博呢對夫妻檔表演，又搵兩人喺紀念杯簽名，每個杯賣50蚊，所得收益捐畀健康快車做善事，開幕禮都搞得有意義過人，抵讚！