郭晉安日前為拍攝無綫新劇《與敵同行》一場放火戲時置身火海中，手持地毯撲熄火燄時，地毯突然起火，安仔為令場面更加逼真沒有即時停止，繼續揮動火燄地毯，場面動魄驚心，幸好有驚無險，終得以完成最佳效果，而事前他聽從指導，做足準備工夫，塗了防火膏及包上保鮮紙以抵禦熱力。
無綫新劇《與敵同行》有不少動作場面，主角郭晉安早前演挾持商天娥，要在13樓外吊威吔拍高難度動作，令老婆歐倩怡十分擔心，日前他又再接受挑戰，拍攝一場講述他被縱火戲，慌忙與劇中飾演家人的秦煌、呂珊、黎萱、姚子羚一起逃生，血流披面的安仔更要親手把火撲熄。
與鄭嘉穎打鬥仲勁
拍攝前，安仔雖然已做足安全措施，塗上防火膏及包了保鮮紙，但他手持的地毯撲火時一度被燃燒，幸好也順利完成，事後安仔說：「通常都係咁，試戲時候冇咁大火，真正拍攝時就會逼真啲，但我都估唔到地毯會着火，感覺雙腳有少少熱力。」安仔坦言：「近年自己都好少拍啲多動作劇集，對上已經係《創世紀》嘅飛車場面，不過今次套劇對於我嚟講都唔算好難，呢啲都係小火嚟，我喺廠內拍一啲同鄭嘉穎打鬥場面反而仲勁，搞到我隻手都有啲擦傷。」
其實早前安仔曾經透露瞞着老婆拍攝動作場面，但報道出街後令老婆十分擔心，今次安仔可有預先向老婆「稟報」，他說：「都冇得擔心太多，大家都明白要工作，太太只叫我事事小心，事實上每次接拍劇集都只知道故事大綱，劇情發展係之後先知。」問到安仔會否禁止老婆拍攝動作戲時，他表示：「唔會，要做就預咗，但女仔會好啲，除非係似女殺手角色先會咁多動作。」此外，安仔透露完成《與》劇後會爭取時間賺外快，11月會再到內地拍劇。
採訪：卓寶花
攝影：陳慧安
