賽馬血統專家自英國回港，參加姪女婚禮，忙咗一個禮拜後，家族盛事辦完，有時間去馬場嘞，於是電召左丁山到香港會食晏，傾星期三賽馬大事。可惜左丁山老早有約，不能赴會，唯有再約過，在跑馬地再見。
去跑馬地馬場搵專家R好易嘅啫，到香港會包廂就一定見到。呢次適逢幾位老友有馬出，要到沙圈捧場，一共四次，真係搞到身水身汗，印刷L啱啱不在港，佢有份嘅團體馬「中華英雄」喺第四場順利輕鬆取勝，賠率有九倍，佢身在海外，唔知有冇買到呢？運氣唔會等人嘅，印刷L係標準馬迷，次次入場，在「中華英雄」身上輸過幾次，偏偏到有賠率而贏馬嗰次，佢就不在場，左丁山唔客氣咯，橫掂又識得佢個賽馬團體啲成員，一於一齊拉頭馬，當係代表印刷L啦。
拉完頭馬上去五樓搵專家R，佢與太太、千金、千金男友、男友父母一齊睇跑馬，R千金話買中「中華英雄」，因為佢鍾意個名"ChinaHero"喎。R千金與男友都係英國頂級名校畢業生，R千金本來係大律師，但因為新進大律師搵食甚艱難，卒之入咗銀行做trainee，男友就做股票sales，跟隨香港現實，投身目前最容易賺錢嘅行業，以佢哋咁嘅背景，加少少運氣就會紮得起。
傾一大輪近況之後，專家R睇住本馬會出版嘅馬簿同左丁山講：「嗱，第五場七號『御名燈』，十號『靈光七號』同係Snippets子嗣，理論上最適合跑快活谷短途，呢場一於買七號、十號單Q。」咁容易？因七號係大熱門，馬主S剛與左丁山一齊拉頭馬（中華英雄），唔通會食一口孖寶？因時間緊迫，唔諗得咁多咯，與專家R急步走向投注窗口，一齊買七、十單Q，跟住衝落沙圈睇賽事，果然十號帶頭，七號衝上取勝，呢條單Q原來好依絲執，最後五號「富有心得」衝上跑第三，左丁山不禁大叫一聲，點解唔記得買埋三重彩，因為馬主吳嵩當「富有心得」係跑馬地提款機，次次有獎金收，係最佳T腳也。馬主S叫左丁山拉頭馬，一晚之內連續拉兩次頭馬，一世人在馬場最威風就係呢次咯。跟住叫專家R買第六場賓架P有份嗰隻「勁速猛將」，呢場卒之輸到眼光光。