今年港股屢創新高，唔少經驗豐富嘅投資者，都唔敢貿然高位接貨，反而一班股市初哥，就膽粗粗入市，結果回報豐厚，可謂盲拳打死老師傅。
Funnychoi總結咗個炒股經驗，「越貼市，越死得快！」佢話：「日日聽埋咁多消息搞亂思維，唔單止影響判斷，仲連累埋日常生活，今年真正贏錢嘅，係問佢揸嗰隻今日乜價都未必答到嗰班。」
美容新丁亦同意，「之前買嗰啲股票，都係買咗就咁擺喺度，幾個月後，先睇吓賺幾多，總之，回報好過做定期同收租就算，點知，近幾個月日日昅實個市，好似好好玩，計落反而賺得仲少，因為成日買買賣賣，蝕手續費都蝕死。」
破軍仔仔都認為有道理，「玩股票，係絕對唔需要對任何消息都有反應。」warrentlam1982就話：「投資唔需要貼市，投機先至要貼住個市。」KEN852亦話：「股票係長線先至反映到真正價值。」
但Wiyoma覺得易學難做，「買咗又點會唔睇實個市呀？」Miceandcat亦話：「唔睇分分鐘死咗都唔知咩嘢事。」easy8就話：「股票如媾女，唔貼又唔得，太貼又唔係咁好。」
stevec9就提議：「太貼市，成日賺少少就走嘅人，之後一旦爆上，就會激到眼都定埋，但唔貼市又好悶，冇嘢玩，所以我有一部份錢攞嚟短炒過日辰，其餘就擺長線。」
http://www18.discuss.com.hk/viewthread.php?tid=5329908&extra=page%3D4