經濟好轉，打工仔自然會心思思想跳吓草裙舞。大老闆最頭痛就係見到呢個情況，試諗諗，唔做得嘢嘅就話由佢走啫，做得嘢嘅，你留佢，隨時有連鎖反應，成隊舞蹈團喺你面前跳，咪話唔搞嘢！
華華明查暗訪，知道滙豐除咗畀一般員工有特別優惠嘅供股計劃、四厘低息樓宇按揭，同埋高息存款之外，仲有一招撒手鐧留住人才──嗱，各大企業老闆，學嘢喇！就係開咗一家「ForStaffOnly」嘅幼稚園。
留人撒手鐧
滙豐個friend同華華講，間「滙豐幼兒學校」開咗17年，只係收集團員工嘅仔女，夠一歲就可以排隊報名，兩歲起可以入學，先到先得，高級基層員工都一視同仁。家吓師生比例大約係1比12，低過出面，三文兩語教學，每個月學費千七八蚊全包，無其他雜費。
間學校最初喺長沙灣創立，當時叫滙豐幼兒中心，2000幾呎，得60個學額；95年喺黃埔花園開多間，3000幾呎，有90幾個學額；到99年，大角嘴滙豐中心入伙，於是索性將兩間幼兒中心合二為一，順便改埋名，家吓5000幾呎校園，可以容納到140個小朋友。
間幼稚園係滙豐畀錢，兼且員工專用，所以由返學、放學時間，到放假安排，都係為班員工度身訂做。朝早9點上堂，但8點已經有老師坐鎮，晚黑可以晏到7點先去接仔，直情係方便啲老闆留員工開OT；暑假日數又少，平日假期就跟足銀行假。
計得盡？未算，華華一開頭就話呢招係滙豐留人才嘅撒手鐧，精髓就係萬一父母唔再喺滙豐做，sorry，唔該轉工之餘，同你個細路轉埋間幼稚園吖！計華華話，呢項員工福利，仲有力過白紙黑字嘅合約，事關毀約大不了賠錢，但做人父母嘅，一諗到自己鬆人會影響埋仔女，咁就真係會三思而行嘞！
[email protected]
其他銀行特別福利
機構：滙豐銀行
福利：領養19歲以下兒童，女職員有10個星期有薪假
機構：美國運通
福利：男士3日有薪陪產假
福利：女性僱員網絡，提供免費課程或講座
機構：渣打銀行
福利：男職員5日有薪陪產，及
福利：男職員5日領養子/女有薪假
機構：恒生銀行
福利：買股票佣金減半
福利：股票存倉/存入/認購新股免收費
機構：各大銀行
福利：員工低息按揭計劃