上禮拜五港股再創新高，但係上升嘅正股只有370隻，下跌嘅股份就有624隻，上升榜排第50嗰隻升6.8%，下跌榜排第50嗰隻就跌6.9%，恒指成份股下跌嘅股份亦唔少，呢種情況近日好普遍，大家有乜睇法？唔明？可以睇吓上禮拜六「讀者信箱」，3個讀者問8隻股票，幾乎全部都係喺好低位，個市升番咁多，股仔仲要繼續插，大家應該明白𠵱家港股嘅炒賣方法已經唔同晒，如果繼續用番以前炒賣嘅方法同經驗，多多錢都唔夠輸，大家應該重新認識個市，然後再檢討入市策略。
中國證監會話「港股直通車」會有上限，咁會唔會打擊股民炒「港股直通車」概念嘅意欲呢？俊樺同大家講係唔會嘅，因為股民聽到嘅只係直通車會開嘅訊息，而唔會理佢限唔限，呢啲其實係股市嘅正常現象。
招行C輪6990：招商銀行（3968）上禮拜五收31.30元，呢隻基金愛股喺高位橫行咗好耐，應該儲足彈藥炒上，先睇36元，破位睇40元，可以買招行C輪6990，現價44仙，槓桿率7.1倍（有效4.5倍），正股升上36元同40元，6990應該喺78仙同1.11元樓上，正股跌穿29.30元止蝕。