有句老掉牙的話：一葉知秋。
那個社會一定未有厄爾尼諾與溫室效應，現時9月尾，我夜晚瞓覺還不太願冚被，未轉黃的綠葉，還是緊緊貼住樹的大髀。天未凉葉未落，打工仔沒有暑假，更難察覺出夏後有個秋，直至又見到曾志偉賣月餅廣告，吓？已經是又可以講一輪集體回憶的12個年頭了，果然「綠葉成蔭」！係喎，志偉來了，秋天還會遠嗎？
一年容易又係佢。
記者：劉嘉蕙
攝影：林栢鈞
闔家上枱 出動78歲老媽
今個秋，志偉拖了隻狗。「拍咁多年月餅廣告，最難忘可謂今次，因為有狗。我一向怕狗，你幾時見過我拍戲有隻狗？不過呢隻狗好乖，叫佢擺尾就擺尾，搞到我都想養番隻！」
香港廣告多藝人更多，甚麼減肥家電音響代言人如月曆女郎氹氹轉，不過志偉與奇華一拍12年、拍過10條廣告片，難得十年人事，回看志偉個樣都冇乜點變。「年年到中秋，鋪天蓋地都見到自己個樣，都唔知佢幫我定我幫佢！」你出錢我出力，女明星拍廣告着條短裙叫瞓身演繹，志偉出動三代仝人到賀，前幾年囡囡曾寶儀及仔仔曾國祥出過鏡，今年他連78歲阿媽也使得郁，「阿媽年年都送好多月餅出去，她覺得禮尚往來，找她拍廣告也沒有抗拒，淨係問『我咁老，會唔會好醜樣？』」
那個廣告，曾媽媽在手機螢幕中亮相，都幾sweet，志偉也認為跟家人拍廣告特別窩心，「做番自己真情流露，好像當年拍《雙城故事》（曾志偉捧影帝作），做阿麟朋友，效果特別好。」公司意思還是自己意思？「公司想，我其實不喜歡高調談家人，周刊拜年相都未影過。」他最近在台灣開電影公司，娛記都好奇怎麼他投資拍戲從不捧愛女？「家庭教育影響，我爸爸是足球教練，我小時候踢波也不靠他出道。同樣道理，囡囡想做主持，我叫她去台灣跟大姐大張小燕，我不希望大家覺得仔女有工作是因為我，這樣他們會較舒服。」
做直播如抽鴉片 抗拒一叮
54歲的曾志偉依然多產，電影密密拍，近年港產片幾個新導演如郭子健、黃精甫，他都有份點蟀，許多一年一度節目他也從不缺席，譬如做主持。每年台慶、東華、港姐、勁歌總選等等等等，少了曾志偉把聲就以為自己轉錯台，電視台直播節目個個司儀照稿讀，惟志偉肯爆肚，翌日娛聞總有格「志偉語錄」，「我喜歡做liveshow，做liveshow像吸鴉片會上癮，做這類節目不可死背稿，要畀即時反應，觀眾才有共鳴。唔好以為我企喺度吹水，我最注重總綵排，排一次睇現場工作人員反應，心中就有個譜。」
去年Yumiko甩褲，他爆出一句「有冇重播」惹來非議，志偉說這是性格一部份，不想改也無從改，「做司儀唯一的界線就是你自己，你係乜嘢人就講乜嘢。我唔會怕得罪人，亦唔會為一次半次經驗耿耿於懷。」想得開才豁得出去，不過原來有一種節目他抗拒，「內地很流行選秀show，類似《殘酷一叮》，我很怕做，要批評參加者，我覺得殘忍。」窒佳麗不殘忍嗎？「唔同，我係承接佳麗答案啫，彈選秀參加者係冇嗰樣整嗰樣。」我的理解是，佢係話佳麗自作孽。
評主持人：王貽興係邊個？
《味分高下》大收，他這gameshow掌門人說得坦白，「好多遊戲以前《獎門人》玩過晒。遊戲節目都係靠嘉賓。不過哈林真係verygood。」近日主持人爭寵風波鬧哄哄，傳說中TVB力捧三子他只跟崔建邦合作過，「崔好好，pickup好快。」新歡鄧健泓呢，「我太留意哈林啦，可能頭幾集，二人默契有待加強，不過估計Patrick會在哈林身上學到好多，其實台灣也流行舊人搭新人，多訓練接班人是好事。」王貽興怎樣？「邊個？……《謎》嗰個？哈，我未睇過。」
後記 志偉令我變港姐
和志偉有點小淵源。話說大學實習我去電視台學寫稿，跟過港姐競選，當年冠軍是最近在劇集扭來扭去的徐子珊。足足兩個半月設計司儀對白，志偉阿叻的名字不停在我耳邊轉，幕前藝人的性格，好一部份還是由幕後編出來的。
我是烚吓烚吓實習妹，埋牙跟司儀tune稿當然冇份，沒法驗證「曾志偉」和「真志偉」到底爭幾遠，倒是一點我最記得，上台前開會後幾分鐘他一定睡着，roll機他又精神。「你一日瞓幾個鐘？」今次趁機問，「4、5個啦……冇得計，我幾時都瞓到。好似𠵱家同你做做吓訪問我都想瞓。」
哎吔！我唔識答，儍了一個笑，然後有點明白佳麗，着泳衣化厚妝幾部camera對住下俾人「得」一句，明寸暗藐冇運行，不如笑咪咪姣答「多謝」閃回後台。
人生難得一趟，志偉令我覺自己似港姐。哇，開心得我呢。多謝。
