細契關菊英喺《溏心風暴》夠毒夠衰格，今晚佢就「洗心革面」，同大家喺新節目《開心聊齋》，搵埋好朋友去食靚齋「素」衷情。
菊姐食過長齋一段日子，對素菜有一定認識，不過佢就話自己識食唔識煮；今勻搵嚟有15年煮素菜經驗的曾師傅教菊姐做簡單又別致的新派上素，其中師傅話最難做的「金榜題名」炒鮮奶，菊姐煮得唔錯，師傅話佢的成功之道就係：「夠刻薄囉！」
記者：廖秀娟
攝影：陳偉強
示範及場地提供：曾偉強師傅@波羅密素食（http://www.paramita.biz.com.hk）
食錯齋先識食齋
細契在加拿大食過一年長齋，但原來佢喺素食得來嘅都係負面經驗，「當年根本唔識食齋，我係佛教徒，以為食齋就係修行，就係唔食肉咁簡單。我求其見菜就食，唔知原來食素要食得營養均衡，卒之搞到營養不良，皮膚又亁又黃，媽咪就叫我唔好食嘞！」
現時菊姐一個月食幾日齋，「𠵱家食齋幸福好多，因為潮流提倡健康素食，食素已經唔係為宗教修行，好多餐廳都有素菜提供，味道好選擇又多；我今次拍素食特輯，食過緬甸、意大利及俄羅斯的素菜，好有特色，食得好開心，而且某啲菜式亦唔難做，好似有款川貝燉橙，將川貝粉開蜜糖放入開窿的橙燉就可以，我都做得到。」燉橙過程已經拍成節目，菊姐大賣話想睇就要捧場睇佢嘞！
5色食齋
菊姐以前唔識食素，搞到身體差晒，今日佢跟波羅密素食店老闆娘葉小姐都教大家，食素食齊5色：紅、黃、綠、白、黑，就可以營養均衡，咁5色素即係咩呢？
紅：番茄、紅洋葱、辣椒、紅椰菜等
黃：黃椒、黃豆、菠蘿、芒果等
綠：所有綠色瓜菜
白：白菜、小棠菜、黃芽白、芽菜等
黑：木耳、菇菌類等
金榜題名
用看似矜貴的素食鮑參翅肚炒鮮奶蛋白，賣相夠高級，實際亦夠營養、健康，餸名夠氣派，上得大枱的宴會菜。
材料
BB蘆笋4両、素翅1両、素鮑魚1/2両、素海參1/2両、蛋白4隻、鮮奶1/4杯、陳醋2茶匙
調味：鹽/粟粉少許
做法
1.素翅浸5小時後汆水備用。素鮑魚及素海參拖水後切絲備用。蘆笋以鹽水灼熟鋪碟底。
2.蛋白加鮮奶加鮑翅三絲，連同調味料拌勻。
3.菜油起鑊，慢火倒入鮮奶三絲料，快手執鑊「啷」幾轉，讓鮮奶料在熱鑊中成薄膜。
4.快手用鑊剷起半生熟的鮮奶料，鋪上蘆笋面，重複做2至3次，至鮮奶料剷完便成。吃時可蘸陳醋添香味。
熱鑊加油後，「啷」勻全隻鑊，然後用亁淨布抹去多餘油份，鮮奶才可炒得冇油又嫩滑。剷鮮奶要夠「刻薄」，落鏟利落、「啷」得夠薄；唔夠快手，鮮奶太熟就唔夠嫩滑，「啷」得太厚，炒出嚟無層次亦唔靚。
馬來亞參魚
新派素菜唔再淨係齋滷味，曾師傅將馬來亞菜式的亞參魚做齋菜，有創意得來亦美味，香辣刺激，齋菜亦不一定淡淡然。
材料
腐皮1塊、紫菜2大塊、鮮腐竹2張、冬菇2粒、木耳/甘笋少許、麵粉少許；調味：鹽/糖/胡椒粉各少許；
汁料：椰漿1/3杯、片糖1/2片、檸檬醋2湯匙、香茅1條、南薑1/2両、黃薑1/2両、青紅椒/九層塔各少許
做法
1.紫菜放在開半的腐皮上，上面再放入鮮腐竹、冬菇粒、木耳粒及甘笋粒，包成手卷形扮魚身。
2.用開成的麵粉水封口，隔水蒸45分鐘。
3.蒸好待凉，然後以170℃油炸2至3分鐘。
4.香茅、南薑及黃薑切碎粒，起鑊炒香加入椰漿、片糖及檸檬醋兜勻，再加入青紅椒及九層塔略兜。最後放入炸魚及調味，略煮1分鐘便可上碟。
吉祥夾
素菜冇肉，味道始終較淡，煎炸食物，可換來香口感覺，蝦多士大家都喜歡，這個冇肉蝦多士的吉祥夾，一樣好味道。
材料
方包3塊、包仔豆腐1件、冬菇粒/素臘腸粒/唐芹粒/芫荽粒/甘笋粒各2湯匙、生菜3塊、芫荽碎少許
調味：粟粉2湯匙、麵粉1湯匙、力康蛋1隻、鹽及麻油各少許
做法
1.豆腐加入各種粒粒及調味料拌勻。
2.分小份釀在分成小塊的麵包上，面再放芫荽碎。
3.放入150℃大滾油中炸2分鐘，便可放在預先切成小塊的生菜上便完成。
貼士
炸時要大火及油滾，否則麵包索油太多，啖啖油，好恐怖！
波羅密拼盤
以前齋舖前菜，必定是一碟橙、黃、黑的麵筋齋滷味，今時今日講時尚、健康，頭盤變成「刺身」及沙律，以蒟蒻做成的，造型神似，食落亦健康。
材料
素吞拿魚/油甘魚/熏蹄/煙鵝片/鮑片各3片；素海蜇/黃螺/中華沙律海藻各3湯匙、日式芥辣1茶匙、青紅椒粒少許；汁料：青檸汁1茶匙、糖1茶匙、醋1/2茶匙
做法
1.素刺身切片上碟；放好其他素螺、中華沙律及海蜇。
2.汁料拌勻做成檸檬醋汁，淋面或放小碟當蘸汁，再放上青紅椒，吃時蘸日式芥辣也可。
貼士
素刺身等食材，可在九龍城一帶素食店買齊。
買定料 明日同你煮餸
龍蝦天使麵
天使麵250克、波士頓龍蝦1隻、大蒜2粒、無鹽牛油120克、番茄醬720毫升、紫蘇葉碎5克
香菇醬焗牛仔柳
荷蘭牛仔柳500克、車厘茄6粒、煙熏Mozzarella芝士120克、迷你菠菜240克、薯茸200克、韭菜粒12克、迷迭香8克、巴拿馬火腿1片、無鹽牛油15克、亁香菇50克、香菇250克、馬德拉酒50毫升、牛柳汁1公升、忌廉500克、百里香2克
三文魚生沙律
三文魚柳400克、珍珠芽菜/甘笋/白蘿蔔/金針菇/紅蘿蔔各10克、芝麻油3茶匙、日式沙律醋40毫升、西柚汁1茶匙、日本豉油5茶匙、日本醋3茶匙、青芥末/烤黑芝麻/烤白芝麻/洋葱/薑茸各1茶匙
雜菌意大利飯
意大利飯350克、雜菜湯900毫升、洋葱粒45克、牛油40克、白酒100毫升、帕馬森芝士80克、新鮮香菇320克、金針菇320克、亁香菇15克、百里香1克、特級初榨橄欖油20克、意大利生菜30克
