香江再步入負利率年代，磚頭股泛海（129）NAV3折有售，抵到爛。泛海往績PE5.7倍，NAV近0.69元，現價（0.28元）折讓近60%，數據已經好吸引。計埋重秤後增值，更加流口水。
泛海家陣揸住油柑頭豪宅項目，應佔樓面10萬平方呎，每方呎地價連補地價成本，只係區區3100蚊。連呢幾年地價升值，加埋香江正步入負利率年代，油柑頭項目出售，利錢肯定高到爆。秤高啲，以項目每方呎獲利5000蚊計，泛海已經可以增值5億銀。齋計呢壇製作，折合現價PE，只係3.9倍。
泛海另外揸住近百萬平方呎土儲及物業，計埋呢批房產增值，NAV可秤到上0.9元，實際折讓講緊近70%，即係NAV嘅3折有售！以NAV折讓50%做目標，泛海股價要見0.45元，潛在升幅60%。
炒一拖博升2成
一拖（038）07年半年度（6月底止）獲利1.2億銀（人仔．下同），當中包括出售交行（3328）法人股利潤7400萬銀，肥過肥仔水。一拖家陣仲揸住交行法人股800萬股，即係話，呢批股份，隨時又令一拖家底水漲船高。又呢期國企炒到如入無人之境，博落後，炒一拖。以橫行區頂5蚊做目標，潛在升幅20%，到時，一拖P/B1.7倍，仲係低過祖國及海外同業起碼一半，但短打已經有魚有肉。
錢雋